Ido-konfero 2001

From Wikipedia

Inter la 17ma e la 21ma di junio 2001 en Nürnberg eventis internaciona Ido-renkontro kun partoprenanti de kin landi. Pro diversa kauzi ca renkontro esis l’ unesma internaciona Ido-kunveno depos internaciona Ido-renkontro 1998 en Polonia. La partoprenanti: Günter Anton (Germania), Frank Kasper (Germania), Marion Kasper (Germania), Zmitro Lapcionak (Belarusia), Manfred Magin (Germania), Jean Martignon (Francia), Alfred Neussner (Germania), Heidi Neussner (Germania), Brad Philpot (Nederlando), Wolfgang Quies (Germania), Eberhard Scholz (Germania), Hans Stuifbergen (Nederlando), Vlado Yakovenko (Polonia), Wanda Yakovenko (Polonia).

La partoprenanti arivis de la 16ma til la 18ma di junio. Kun plezuro Frank Kasper salutis ye la vespero dil 16 di junio Idisti en Nürnberg. Ilu kordialege bonvenigis en Nürnberg Jean Martignon de Francia, Hans Stuifbergen e Brad Philpot de Nederlando.

Indexo 1 17 di junio 2 18 di junio 3 19 di junio 4 20 di junio

[redaktar] 17 di junio

Preske omna altra gasti arivis ye 17 di junio. Arivis samideani Zmitro de Belarusia e le Yakovenko de Polonia. Fine esis 14 gesamideani de quar landi. Omni bone interkomprenis en Ido qua esis l’ unika posibla komunikilo. On promenis tra la bela anciena urbo Nürnberg, sub tre chanjema vetero.

[redaktar] 18 di junio

La renkontro komencis dum la matino dil 18 di junio kun veho per la specala treneto tra la belega anciena urbo di Nürnberg. Pose konferani promenis a la kastelo di Nürnberg e de ibe a la centro dil urbo, ube on dejunis.

Dum la posdimezo komencis la diskuti. Antee ankore jurnalisto di la regionala jurnalo Nürnberger Nachrichten vizitis la rondo ed interviuvis la prezidanto e viceprezidanto dil ULI e Frank Kasper kom organizero dil renkontro. Lu tre interesis audar pri Ido e fotografisto facis kelka fotografuri de nia rondo. Artiklo pri la renkontro fine aparis dum saturdio la 24 di junio en mencionita jurnalo.

On diskutis pri diversa Ido-aferi, exemple pri Idala revui e pri to, quale on agos por atingar la ISO-kodo "io" por Ido. Cetere nia ULI-prezidanto Günter Anton klarigis la laboro dil Linguala Komisitaro dil ULI e quale on ibe povas aktive partoprenar.

La ne-Germana samideani uzis l' okaziono por asistar paralele la programo dil Ido-renkontro eventita renkontro dil Esperanto-Grupo Nürnberg ed ibe prezentar Ido kom alternativo por Esperanto. Samatempe en l' Ido-renkontreyo eventis kunveno di la Germana Ido-Societo. Fine ye 22.00 kloko konferani eniris l’ Ido-babileyo e dum preske un horo diskutis ibe kun kelka samideani.

[redaktar] 19 di junio

Matine la 19 di junio esis ped-exkurso tra l’ urbo. Ye 12.00 konferani vartis e sucesis observar la Irado di Viri en la kirko di Santa Maria. En la supra parto dil kirko apertesis du pordeti e sep apostoli trifoye rondiris cirkum la rejo.

Posdimeze esis kunsido dil partoprenanti. On diskutis dum la kunsido pri reto (pri l’ uzo e l’ utileso di reto por difuzar la linguo en reto e ganor nova interesati), Frank Kasper raportis pri nova posiblesi rezervar adreso www.ido.inf por la ULI.

Vespere konferani vizitis famoza restorerio. Ante, dum e pos la manjo oni multe babilis pri diversa temi.

[redaktar] 20 di junio

Matine 20 di junio esis la lasta komuna kunsido dum la renkontro. Komence on diskutis pri la futuro dil Ido-movado.

• Maxim importanta skopo esas ganar nova membri. Lo povas esar facata per reto e per anunci en diversa revui nacionala, jurnali edc.
• Esas konocata generala (ne nur en Ido-movado) tendenco, ke homi ordinare ne volas membreskar en ula organizuro, nur partoprenar la movado. Malgre to, plusa membri dil ULI esas necesata.
• Ido esas defenso di mikra lingui. L’ Angla ja exekutas la rolo di inter-linguo, ed esas vaste difuzita. Ma ol adportas anke la Angla (Usana) kulturo, penso-maniero. Tamen Ido portos neutrala inter-kulturo. Ico povas uzesar en propagili, reklamili.
• Malgre to ke ja existas unikodo, la posibleso uzar en komputoro multega, preske omna literi e signi di omna lingui, ica posibleso ne esas facila e quik uzebla da omnu. Pro to Ido-linguo havas granda avantajo kompare ad Esperanto e multa nacionala lingui, qui havas literi apud la Latina alfabeto.
• On parolis pri la posibleso uzor auxiliara linguo kom ponto dum traduko inter altra lingui e dum kontakti inter homo e komputoro. Ido esas tre apta por ica skopo esante tre preciza.
• Ankorafoye esis atencita, ke Idisti ne disipez tempo por sensenca diskuti. La tota energio, forto mustas uzesar por la movado, por avancigado la linguo. Tre importanta tasko esas kreadar literaturo. L’ inklino a reformo-diskuti esas indikilo pri to ke homo esas nova a la linguo, ne bone konocas ol, ne tote posedas omna posiblesi di ol. Qua bone savas la linguo, komprenas apteso e suficeso di ol en nuna formo. Qua lektis la historio di Ido, savas, qua eminenta ciencisti kreadis la linguo. Nun la chanco, ke ula propozo pri chanjo (gramatikal) esos aceptita, esas tre mikra. Posiblesas nur oficialigo di nova vorti. On mustas esar membro dil ULI, la propozo sendesas a lingual komitato, qua konsideras ol per diskuti. Pose la direktanta komitato decidas pri aceptor ol, o ne.
• La listo di nova vorti mustas publikesar en ula revuo, jurnalo edc. Dum la recenta tempo aparis multega vorti, qui ankore ne existas en Ido (komputorala, financala, politikala edc.). To esas granda tasko por linguala komitato. Anke necesesas kunlaboranti de diversa landi kun bona savo en koncernata cienco. En la nuna listo di nova vorti esas multa ciencala nocioni, ma ofte ne esas ti por omnadiala uzo, qui esas plu importanta por la linguo. Krear nova vorti ne signifikas sempre krear nova radiki. On povas facar kombinuri o donar ad existanta vorti nova senco.

Diskuto pri Ido-flago. On venis a konkluzo, ke esas necesanta havar flago ed uzor ol dum renkontri, precipue en publika loki. Alfred Neussner sendos un exemplo a Frank Kasper, qua facos komputorala modelo. Pose on povos imprimar la desegnuro e produktar papera flageto. Esas tre bona ideo havar e vestar T-kamizi kun menciono pri Ido, propoganda-skope.

Pri insigni. Semblas, ke insigni ne esas nun tre populara, ma on ne devas obliviar anke ica moyeno demonstrar Ido. Necesesas questionar la Britaniana Ido-societo, ka la societo havas insigni (esas menciono en la listo di vendebla libri), ka la insigni esas ri-produktebla.

Pri Ido-renkontro en nexta yaro. Frank Kasper propozis organizor ol ankorafoye en Germania. La lando esas tre bone acesebla por multa homi, do, existas plu granda kauzo por Idisti elektor ol. En Großbothen (apud Leipzig) eventos kongreso honore a Wilhelm Ostwald Nobel-laureto pri kemio, ma ante omno anke pioniro e kunkreanto di Ido. Frank vizitos la urbeto, exploros diversa varianti e propozos bela programo. Ultre la dato-reveno di Ostwald, anke la turistala questiono mustas konsideresar.

Fine di la lasta oficiala kunsido on kompilis adresaro dil partoprenanti, qua forsan esos publikigita, pozita en reto kun kurta noti, memoraji pri la renkontro. Dum la dimezo la maxim multa partoprenanti departis. La restinta gesamideani ankorfoye promenis tra l’ urbo e dum la vespero vizitis la Germana Nacionala Muzeo kun la Strado dil Yuri Homala. L’ iro en la muzeo merkurdie vespere esas gratuita. – L’ oficiala programo esis finita, ma parto di la konferani duris la konfero ne-oficiale.