Keflavíkurstöðin

Úr Wikipediu, frjálsa alfræðiritinu

Merki Keflavíkurstöðvarinnar.

Keflavíkurstöðin (enska: Naval Air Station Keflavik) var herstöð Bandaríkjanna á Miðnesheiði, við Keflavíkurflugvöll. Hún var oft í daglegu tali kölluð „Keflavíkurflugvöllur“ eða „Völlurinn“. Hún var opnuð 1951 og fyrsta herliðið sem notaði hana var Varnarlið á Íslandi sem var myndað sama ár úr flokkum úr landher, sjóher og lofther Bandaríkjanna. Stöðin var rekin af Bandaríkjaflota sem flugbækistöð frá árinu 1961. Þegar mest var töldu hermenn, starfslið hersins og hinna ýmsu stofnana á stöðinni og fjölskyldur þeirra um 5700 manns. Að auki dvöldust þar oft hópar hermanna tímabundið til æfinga eða vegna flutninga. Á herstöðinni voru, auk íbúðarhúsa og hernaðarmannvirkja, verslanir, skólar, sjúkrahús, kvikmyndahús, íþróttahús, skemmtistaðir og allt það sem þurfti til að þjónusta íbúana.

Eftir lok Kalda stríðsins var ljóst að hernaðarlegt mikilvægi stöðvarinnar var snöggtum minna en áður og fljótlega eftir 1990 hófust umræður um að stöðinni yrði lokað eða dregið verulega úr starfsemi hennar. Í miðju Íraksstríðinu þar sem mjög reyndi á styrk Bandaríkjahers var síðan tekin ákvörðun um að loka herstöðinni endanlega. 30. september 2006 var íslenskum stjórnvöldum formlega afhent stöðin af síðasta yfirmanni hennar, Mark S. Laughton kafteini í Bandaríkjaflota.

Í framhaldinu hefur verið talað um varnarsvæðið, og er þar átt við stöðina og nærliggjandi svæði með byggingum og þeirri aðstöðu sem þar býðst, og hvernig best sé að nýta það.^[1] Í október 2006 var Þróunarfélag Keflavíkurflugvallar stofnað. Formaður félagsins er Magnús Gunnarsson en aðrir í stjórn eru Stefán Þórarinsson og Árni Sigfússon, bæjarstjóri í Reykjanesbæ. Varamenn eru Hildur Árnadóttir, Helga Sigrún Harðardóttir og Sigurður Valur Ásbjarnarson, bæjarstjóri í Sandgerði. Félaginu er gert að skipuleggja varnarsvæðið þannig að hægt sé að selja og leigja húsnæðið á svæðinu.^[2] Í byrjun árs 2007 bárust fregnir af því að 106 íbúðir hefðu orðið fyrir skemmdum vegna vatnsleka. Þetta hafði skeð í nóvember, á þeim tíma sem rekstur húsnæðisins var í höndum utanríkisráðuneytisins. Þjónustusamningur um að fjármálaráðuneytið myndi taka við rekstrinum var undirritaður í byrjun desember. Ríkisendurskoðun á eftir að birta mat á tjóninu. ^[3]