Malmö

Úr Wikipediu, frjálsa alfræðiritinu

Malmö á Svíþjóðarkortinu

Malmö . er þriðja stærsta borg Svíþjóðar, á suðvesturhorni Skáns, andspænis Kaupmannahöfn við Eyrarsundið. Íbúar eru 271.000. Malmö varð snemma ein af helstu iðnaðarborgum Norðurlanda en hefur á síðustu áratugum átt í miklum erfiðleikum með að aðlagast nýjum tímum.

Íbúar Malmö eiga rætur víða, um 24% íbúa eru fæddir erlendis og er um helmingur nemenda í grunnskólunum svo nefndir nýbúar eða afkomendur þeirra. Einnig eru fjölmargir múslimar í borginni eða um 16% íbúa.

Með brúartengslum við Kaupmannahöfn hefur menningar- og efnahagslíf Malmö fengið nýtt líf.

[breyta] Saga

Kort af Malmö frá 1580

Malmö á rætur að rekja til ferjustaðar fyrir erkibiskupinn af Lundi á 13. öld og var þá danskt land. Lundur er um 20 kílómetera norðaustur af Malmö.

Bygging Sankt Petri kirkjunnar hófst 1290, hún er ein af elstu gotnesku kirkjubyggingunum á Norðurlöndum og sú elsta í núverandi Svíþjóð. Svipaðar kirkjur er að finna víða á því svæði sem Hansakaupmenn störfuðu á. Malmö var miðstöð Hansakaupmanna við Eyrarsund og einn af mikilvægusta bæjum Danaveldis. Eftir að Svíakonungar náðu undir sig Skáni 1648 varð hlutverk Malmö allt annað. Verslun og efnahagslíf dróst mjög saman og var þanning komið 1730 að einungis 282 íbúar voru í borginni. Það er ekki fyrr en á seinni hluta 19.aldar sem Malmö nær sér á strik að nýju og áttu nýir samgönguhættir með járnbrautarlestum mikinn þátt í því.

[breyta] Landlýsing

Malmö liggur á 13°00' austur og 55°35' norður. Borgin er syðsti bær í Svíþjóð og er skemmra þaðan til ítölsku borgarinnar Mílanó en nyrstu sænsku borgarinnar Kiruna.

Með Eyrarsundsbrúnni varð Malmö aftur nátengd Kaupmannahöfn. Brúin var vígð 1. júlí ár 2000 og er 8 kílómetra löng. Öll tengingin, brú, tilbúin eyja (Piparhólminn) og göng undir hluta sundsins er 16 kílómetra löng. Þetta hefur gjörbreytt samgöngum, meðal annars fara lestir milli Malmö og Kaupmannahafnar á 20 mínútna fresti yfir brúna.

[breyta] Efnahagslíf

Efnahagslíf Malmö einkendist lengi af þungaiðnaði og ekki síst skipasmíði þar sem stærst og frægast var Kockums. Nú eru flestar skipsmiðjur lokaðar og sama á við um annan þungaiðnað. Er mikið atvinnuleysi í Malmö af þessum orsökum.

[breyta] Íslendingar í Malmö

Stór hópur Íslendinga fluttist búferlum til Malmö í atvinnuleit í lok sjöunda og byrjun áttunda áratugs síðustu aldar, þegar sem mest atvinnuleysi var á Íslandi. Fóru margir þeirra í störf hjá Kockums. Mjög margir þeirra hafa ílengst og er fjölmenn nýlenda Íslendinga og athafnasamt Íslendingafélag í borginni.

Malmö var fyrrum kölluð Málmhaugar á íslensku.

Vefur Íslendingafélagsins í Gautaborg

[breyta] Myndasyrpa

Ráðhúsið í Malmö byggt 1546 við Stortorget	Borgarbókasafnið	Kastalinn í Malmö, nú safn	Eyrarsundsbrúin
Kirkja heilags Petri byggð um 1290	Aðaljárnbrautarstöðin byggð 1920