Samningur um stjórnarskrá fyrir Evrópu
Úr Wikipediu, frjálsa alfræðiritinu
Samningur um stjórnarskrá fyrir Evrópu, oftast þekktur einfaldlega sem Stjórnarskrá Evrópusambandsins, er þjóðréttarsamningur sem undirritaður var árið 2004 og bíður nú staðfestingar allra aðildarríkja. Samningurinn hefur það að markmiði að koma á stjórnarskrá fyrir Evrópusambandið sem á að leysa af hólmi fjölda eldri samninga sem nú mynda lagagrundvöll sambandsins og einfalda ákvarðanatökuferlið innan þess en sambandið samanstendur nú af 25 ríkjum. Þrátt fyrir nafngiftina tekur stjórnarskráin aðeins til aðildarríkja ESB en ekki allrar Evrópu.
Til þess að stjórnarskráin taki gildi þarf hún að hljóta samþykki allra aðildarríkjanna 25. Sum ríki hafa haldið þjóðaratkvæðagreiðslur um málið en í öðrum hefur samþykki þingsins verið látið duga. 14 ríki hafa nú samþykkt stjórnarskrána (apríl 2006) en málið er í uppnámi vegna þess að henni var hafnað í atkvæðagreiðslum í Frakklandi og Hollandi í maí og júní 2005. Óljóst er hvað verður um stjórnarskrána núna.
