Dräi Kinnekräicher vu Korea
Vu Wikipedia, der fräier Enzyklopedie.
D'Dräi Kinnekräicher vu Korea waren d'Kinnekräicher Goguryeo, Baekje a Silla, déi d'koreanesch Hallefinsel an d'Mandschurei vum 1. Joerhonnert v. Chr. bis zum 7. Joerhonnert occupéiert hunn. Aner méi kleng Kinnekräicher a Stämm hu während an no dëser Period bestanen, zu deenen ënner anerem Gayac, Dongye, Okjeo, Buyeo, Usan, an Tamna zielen.
D'Period fänkt traditionnell 57 v. Chr. un, wéi d'Kinnekräich vu Saro am Süd-Oste vun der Hallewinsel eng gewëssen Onofhängegkeet vis-à-vis vun der Han Dynastie gewënnt. Déi zwee aner, Koguryŏ (nërdlech a südlech vum Floss Yalou) a Paekche am Süd-Oste vun der Hallefinsel (ronderëm d'heitegt Seoul) gi 37 respektiv 18 v. Chr. vu China onofhängeg. Dëst Kinnekräich trennt sech vu Koguryŏ a gëtt zu engem Asyl fir Baueren, déi vrun engem kriegeresche Staat fortlafen. D'Haaptstad war um Ufank Ungjin (haut Gongju oder Chongju), duerno Sabi (haut Puyo) südëstlech vu Seoul. D'Gaya-Staaten (가야) trennen sech vu Paekche am 1. Joerhonnert eiser Zäit.
D'Verschwanne vum Räich vun der Han Dynastie ufanks vum 3. Joerhonnert, huet et denen dräi Kinnekräicher erméiglecht, sech weiderzeentwëcklen. D'héich koreanesch Gesellschaft entdeckt de Konfuzianismus zënter dem 1. Joerhonnert. Dësen huet awer am Buddhismus säi Géigner fonnt.
Koguryŏ, dat gréisst vun den dräi Kinnekräicher, hat zwou Haaptstied, Nangnang (haut Pyongyang) a Kungnæ um Floss Yalou. Ufanks war et nëmmen eng Federatioun un der Grenz vu China, mee no a no eruewert Koguryŏ ëmmer méi Territoiren an der Mandschurei a verdreiwt déi lescht Chinesen 313 vu Nangnang. De kulturellen Afloss war awer net méi réckgängeg ze maachen, an de Buddhismus gëtt offiziell Relioun am Joer 372.
Am 4. Joerhonnert war Paekche wirtschaftlech zimlech gutt drun, an huet quasi eng Halschent vum südlechen Deel vun der Hallefinsel dominéiert.
D'Kinnekräich Saro, wat 503 a Silla emgedeeft gouf, eruewert d'Staate Kaya oder Gaya (befestegt Stied) a senger Noperschaft Ufanks vum 6. Joerhonnert. D'Haaptstad war Gumsong (haut Gyeongju oder Kyongju). De Buddhismus gëtt offiziell Relioun am Joer 528.
Mat der chinesescher Tang Dynastie liéiert, annexéiert Silla Koguryŏ am Joer 668, nodeems Paekche schonns 660 eruewert gouf, wat zur Silla Period féiert.
