Massaker vu Wassy
Vu Wikipedia, der fräier Enzyklopedie.
Fir d'franséisch Protestanten, och Hugenotte genannt, ass d'Massaker vu Wassy, den 1. Mäerz 1562, den Ufank vun de Reliounskricher.
[Änneren] Kontext
Den 19. Oktober 1561 verléisst de François de Guise de kinneklechen Haff fir domadder géint d'sougenannt modérés am Conseil vum Kinnek ze protestéieren. De 17. Januar 1562 gëtt den Edikt vum Januar verëffentlecht dee provisoresch d'Verbuet vum protestantesche Kult ophieft soulaang dëse baussent de Stadmaueren zelebréiert gëtt. Zu gudder Lescht duerf een och d'spektakulär Ännerung vun der politescher Konjunktur um franséische Kinnekshaff net vergiessen, wéi den Antoine de Bourbon, Kinnek vun der Navarre sech fir de Clan vun de Katholiken entscheed. Dëst erméiglecht dem Guise zeréckzekommen. Dësen hat sech op seng Lännereien an der Champagne zeréckgezunn, an dono op d'Lännereie vum Bëschof vu Stroossbuerg. Um Wee zeréck a Frankräich mecht hien eng Paus zu Wassy, waarscheinlech fir an d'Mass ze goen.
[Änneren] De Massaker
Wassy befënnt sech an der Champagne, an ass eng kleng Stad vun ëm déi 3000 Awunner. Si läit net wäit vu Joinville ewech, dem traditionnelle Sëtz vun der Famill Guise. Zanter Oktober 1561 gëtt et hei eng protestantesch Kierch déi vill Gleeweger unzitt. Dëst ass fir d'Antoinette de Bourbon, Mamm vum Guise, e Skandal. Un dësem 1. Mäerz befanne sech ëm déi 600 Leit an enger Scheier fir d'protestantesch Mass. Dës Scheier befënnt sech nach bannend de Mauere vun der Stad. De Guise, no de Kloe vu senger Mamm an dem Prieur vu Wassy, schéckt dräi Männer op d'Plaz fir sech méi genee z'informéiere wat do fir sech geet. D'Situatioun eskaléiert, an no Beleidegungen op béide Säite gräifen d'Katholiken zu de Waffen a massakréieren d'onbewaffnet Hugenotten. D'Zuel vun den Doudege läit tëscht 25 a 50, an et ginn eng Ronn 150 Blesséierter gezielt.
