Saint-Barthélemy (Guadeloupe)

Vu Wikipedia, der fräier Enzyklopedie.

Satellitebild vu Saint-Barthélemy

Saint-Barthélemy (och St. Barts genannt) ass eng Insel vun de Klengen Antillen, déi zum franséischen Departement vun déisäit dem Mier Guadeloupe gehéiert.

Et huet eng Fläch vun 21 km² an eng 6.900 Awunner (1999), deemno 327 Awunner pro km².

Wope vu St.-Barthélemy, mat de Fleurs de Lys vum franséische Kinnek, dem Malteserkräiz an de schwedesche Krounen

[Änneren] Geschicht

D'Insel, op deer Karaiben gelieft hunn, gouf 1493 vum Christoph Kolumbus entdeckt an nom Schutzpatroun vu sengem Brudder Bartolomeo benannt.

1648 hunn d'Fransousen ugefaangen, d'Insel ze koloniséieren. 1651 huet d'franséisch Kroun d'Insel un de Malteseruerde verkaf. 5 Joer drop sinn d'Siddler vun den Indigènë verdriwwe ginn, an eréischt 1763 hunn sech op en Neits franséisch Siddler hei néiergelooss. Si koume virun allem aus der Normandie an der Bretagne, wat och nach haut am patois vun den Awunner ze héieren ass.

Well d'Insel net vill hirginn huet - d'Drénkwaasser z.B. huet misse mat Schëffer erbäitransportéiert ginn -, huet de franséische Kinnek Louis XVI. se 1785 dem schwedesche Kinnek Gustav III., am Tosch géint en Handelsrecht mat Göteborg, iwwerlooss. Nom Gustav benannt ass déi haiteg Haaptstad Gustavia. Dësen Hafen hat de Status vun engem Fräihandelshafen an ass wirtschaftlech opgeblitt, bis 1852 e Feier bal déi ganz Uertschaft zerstéiert huet. Den 10. August 1877 hunn d'Fransousen d'Insel nees fir 80.000 Francs zeréckkaf.

Bis an d'Hallschecht vum 20. Joerhonnert huet d'Insel vu Fëschfank, e bësse Landwirtschaft a Kottengsubau gelieft. Dunn hunn e Grappvoll Milliardären, dorënner den David Rockefeller an den Edmond de Rothschild Gefalen un der ofgeleeëner Insel fonnt, an sech do Villae baue gelooss. Och e Luxushotel, wou d'Stare vun deemools sech d'Klensch an d'Hand ginn hunn, huet mat dozou bäigedroen, dass St. Barthélemy haut eng Zort Monaco an der Karibik ass. Luxustourismus ass dann och d'Haaptwirtschaftsquell vun der Insel.

Den Hafe vu Gustavia.

[Änneren] Politik

D'Insel ass eng eenzeg Gemeng. Zesumme mam Norddeel vun der Nopeschinsel Saint Martin forméiert se d' Arrondissement des Îles du Nord, dat säi Chef-lieu zu Marigot op Saint Martin huet.

De 7. Dezember 2003, hunn d'Awunner, d' Saint-Barths an engem Referendum dofir gestëmmt, eng Collectivité d'outre-mer ze ginn, déi sech 2007 vu Gouadeloupe lassmécht.