Sex
Vu Wikipedia, der fräier Enzyklopedie.
Ënnert Sex (Fachausdrock: Kopulatioun) versteet een am allgemenge Sproochgebrauch all Zort vu sexuellem Kontakt tëschent zwou oder méi Persounen. Wëssenschaftlech genee agrenzbar ass dee Begrëff dowéinst net. D'Wuert Sex am moderne lëtzebuergesche Sprochgebrauch kënnt aus dem US-Engleschen, wou Sex als Ofkierzung fir sexual intercourse gewéinlech als Bezeechnung fir Geschlechtsverkéier gebraucht gëtt. Am Allgemenge bezeechent Sex haut och all déi aner Praktike wéi Analverkéier, Oralverkéier, Petting, etc., esoubal méi wéi eng Persoun bedeelegt ass.
Wa méi wéi zwou Persounen um Sex bedeelegt sinn, da gëtt vu Gruppesex geschwat, am spezielle Fall vun dräi Bedeelegten ëmgangssproochlech och vun engem Flotten Dräier. Sex, un deem just eng Persoun bedeelegt ass, ass definitiounsgeméiss en Oxymoron, et handelt sech an dësem Fall ëm Masturbatioun.
Op e sexuelle Kontakt erlaabt soll sinn oder net, do hunn all d'Gesellschaften hir moralesch Virstellungen dozou, och a virun allem am Hibléck op de Geschlechtsverkéier als deen Akt, dee schlussendlech de Fortbestand vun enger Gesellschaft duerch d'Prokreatioun vun neie Generatiounen zuwee brénge muss. Esou gëtt z.B. Inzest vun deene meschte Gesellschafte wéinst der Gefor vun Inzucht verworf. All dës moralesch Virstellungen ginn als Sexualmoral bezeechent.
Sex tëschent Déiere gëtt normalerweis Begattung genannt, nëmme bei de Bonoboafen déngt Sex ähnlech wéi bäim Mensch och der sozialer Interaktioun.
