Bussum

Van Wikipedia

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.

Ligking vaan Bussum in Noord-Holland

Bussum is e versteidelik dörp en 'n gemeinte in de Nederlandse provincie Noord-Holland, in 't Gooi, mèt (1 juli 2006) 31.273 inwoeners en 'n oppervlak vaan 8,10 km² (daovaan 0,06 km² water). Heidoor is Bussum en sterk steidelike, diechbevolkde gemeinte. Binne Bussum ligke gein ander kerne, meh wel e deil vaan 't dörp Crailo.

[bewirk] Gemeintelike functies

De meiste inwoeners zien forense, die in Hilversum of Amsterdam wèrke. De televisie-studio's, die vreuger in Bussum gevesteg waore, zien allaank nao 't Mediapark in Hilversum verhuus. In de gemeinte stoon drei middelbaor sjaole, die door lierlinge tot boete 't Gooi bezoch weure. Wijers ligk Kamp Crailo, e militair exercitieterrein, binne de gemeintegrenze.

[bewirk] Aongeziech

Bussum heet zie dörps aongeziech bekaans gans verlore. E belangriek monumint is de neogotische Vituskèrk in 't dörpscintrum oet 1884, nao 'n oontwerp vaan Pierre Cuypers. Westelik vaan 't cintrum ligk Het Spieghel, 'ne villawiek dee tösse oongeveer 1870 en 1940 oontstoon is en tot de ajdste in zien saort huurt. Oostelik daovaan vint me 't Brediuskwartier, e tuindörp mèt ouch hoezer veur rieker lui. Te zuie ligk de nao-oorlogse wiek Bussum-Zuid.

In 't noorde slut de bebouwing direk aon op Naarden, in 't zuie evels neet direk op Hilversum. Hei vint me 't heigebeed De Franse Kamp.

[bewirk] Historie

't Gooi, wat hoeg ligk en bij 'n euverstruiming neet oonder water löp, is ein vaan de ajdste bewoende gebeier vaan Nederland. Bussum, boevaan de naom te verklaore is es bös-heim, is roond 't jaor 1000 oontstoon. 't Belangriekste middel vaan bestoon waor de sjaophawwerij, umtot d'n erme groond neet te väöl akkerbouw permeteert. Later weurt Bussum belangrieker es textielcintrum (spinne en weve). Aonvenkelik is de plaots bezit vaan Naarden; later in de Middeliewe weurt 't dörp zelfstendeg.

In 1874 kump de spoerlien vaan Amsterdam nao Hilversum veerdeg. Bussum, wat mèt Naarden 'n statie deilt, kump noe oet zien isolemint, en väöl rieke Amsterdammers vestege ziech in dees rustieke umgeving. Heidoor greujt 't dörp snel. Behave de welgestèlde vestege ziech hei ouch väöl kunstenere, in de ierste plaots sjrievers. Frederik van Eeden riechde hei de kolonie Walden op, en mèt-tachtegers Herman Gorter en Willem Kloos kaome ouch in Bussum woene. In d'n Ierste Wereldoorlog naom Bussum mier es 1000 Belzje vlöchtelinge op. Vaanaof 1951 voonte hei de televisie-oetzendinge plaots, die intösse nao Hilversum verplaots zien (zuug bove). In recinte tije heet de gemeinte te make mèt 'n sterke vergriezing door 't nao-oorlogs forensisme.