Gerd Leers
Van Wikipedia
Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.
Gerd Leers (Kèrkraoj, 12 juli 1951) is 'ne Limburgse politicus vaan 't CDA. Heer waor vaanaof 4 september 1990 lid vaan de Twiede Kamer en is sins 1 fibberwari 2002 börgemeister vaan Mestreech.
Es kamerlid waor heer bekind um zien gooj kinnes vaan dossiers. Heer concentreerde ziech veural op de NS, meh brach ouch mèt de Bouwfraude aon 't leech. Dit kin me es 't huugdepunt vaan zien carrière es kamerlid zien.
Es börgemeister kraog heer de reputatie doortastend en effectief te werk te goon, zoonder te väöl börgers tege ziech in 't harnas te jaoge. Heer besloot beveurbeeld veur de gemeintelike subsidie aon foetbalclub MVV te stoppe, wat häöm op väöl proteste kaom te stoon. Ouch sjikde heer nao jaore gedoogbeleid de pliesie op 't woenwagelekamp Vinkenslag aof, woe talloos sjarzjes verriech woorte. Proteste heitege lègke korten tied de A2 plat. In 2005 lojde heer de alarmklok euver 't Nederlands gedoogbeleid veur softdrugs, wat in Mestreech veur extreem euverlas zörgde. Mèt al dees acties haolden 'r 't landelik nuits.
Heer heet ziech herhaoldelik kritisch oetgesproke euver de regering vaan Jan Peter Balkenende, dee evels premier veur zien eige partij is. Zoe vint 'r hun hajding tegeneuver asielzeukers te hel. Sins jannewari 2003 is 'r, es nevefunctie, veurzitter vaan 't LOCOV, 'n organisatie veur 't verbetere vaan de deensverliening op 't spoor.
In 2006 wèrkden 'r es rapper mèt aon 'n single, geneump Da's toch dope man!, vaan de Haorster punkband De Heideroosjes. Hei-in pleit heer veur de legalisering vaan softdrugs.
