Jacques Chirac
Van Wikipedia
Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.
Jaques Réne Chirac (Paries, 29 november 1932) is president vaan Frankriek sins 1995. In die kwaliteit is heer ouch mede-prins vaan Andorra ('n ceremonieel functie). Heer is lid vaan de UMP en volgde François Mitterand op. Zien polletiek is conservatief en weurt in Franse kringe dèks es gaullistisch aongemèrk.
[bewirk] Leve
Nao 't lyceum gong heer in 1951 studere aon 't prestizjeus Institut d'études politiques de Paris, boe heer in 1954 aofstudeerde. In dee studie zaat ouch 'ne cursus op de Harvard-universiteit, boemèt heer 'n veur Franse oongebroekelike kinnis vaan 't Ingels verkroog. Ouch studeerde heer aon 'n militair academie; officier moch heer evels neet weure umtot heer communistische sympathieë hej.
In de jaore zesteg woort heer 'ne gaullis. Op aontaoje vaan Georges Pompidou stèlde heer ziech in 1967 kandidaat veur de Assemblée Nationale. Vaanaof 1972 waor heer minister, iers vaan landbouw, laoter vaan Binnelandse Affaire en teslotte in 1974 premier. In 1977 woort heer börgemeister vaan Paries, wat heer tot 1995 bloof. In de laote jaore negenteg kaome corruptiesjandale oet zienen tied es börgemeister bove waoter.
In 1995 versloog heer socialis Lionel Jospin in de race um 't presidentsjap. In 2002 herhaalde heer dat; daan woort heer euveregens door 'n wetsveraandering meh veur vief jaor gekoze.
Datzelfde jaor kaom heer negatief in 't nuits door ach kèrnproeve bij 't onbewoend atol Mururoa in de Stille Oceaan. In Papeete op Tahiti braoke relle oet en väöl politici kierde häöm de rögk touw. Ouch oontstoont e langdeureg conflik mèt Nederland euver 't Nederlandse drugsbeleid. Eint en aandert zörgde veur boycotte door consuminte.
Critici neume häöm 'ne "kameleon" en e "windvaan" umtot heer zien polletiek zouw aofstumme op wat häöm good oetkump. Tijens festiviteite op 14 juli 2002 euverleefde heer 'nen attentaat.
