Kasteel Neercanne

Van Wikipedia

Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.

Château Neercanne in 2005

Kesjtièl Neercanne ies 'n landhoes in mergel geboewd, op 'n terras van de Jezuïteberg en de Canner-hellingbösj bie Mestreech. De boewsjtein kump oet de achterliegkende berg. 't Kiek oet op 't dal en de krunkelende rivier de Jeker en de achterliegkende berg: d'n Observant en de Sint Pietersberg. 't Plaetske Kanne en de buurtsjap Neerkanne liegke vlak bie, op 't Belsj. De grens löp tamelik geforceerd langs 't good van 't kesjtièl. In 1843 haet baron van Trier (Oranje-gezind) namelik d'r veur gezörg dat zien landgood op Nederlands gróndgebeed kaom te liegke.
In de 14e ièw ies sjpraoke van 'n kesjtièl Agimont in de hièrlikheid Neerkanne. In de dao-opvolgende ièwe zint de families Chabot, De Villers, Pité, Van der Straeten en Melchior van Pallant eigenaer. Deze van Pallant lièt 't kesjtièl renovere in 1607. Hae boewt ouch d'n aanliegkende haof L'Auberge. In 1643 weurt 't landgood verkoch aan de Luukse burgemeister Philippe de Wansoulle. De familie verköp 't in 1697 aan de de commandant van de vesting Mestreech: Baron Daniël Van Dopff. Hae zal 't landhoes 't aanzeen van tegewoordig geve. De facade besjteit oet 'ne mieddegevel, bekroand mèt 'n gebeeldhouwd fronton, en twiè zievleugele. Daoveur bevinge ziech tuine op terrasse. In 1761 weurt Marie Agnes barones de Cler eigenaresse en vervolges weurt in 1791 baron Ignace de Thier erfgenaam. In de dao op volgende ièw wone de erve Poswick es lètste familie in Neercanne. In 1947 geit 't landgood euver in heng van sjtiechting 't Limburgs Landschap. Nao ein restauratie in 1955 ies d'r ein hotel-restaurant in gevestig. In de jaore daonao weure ouch de terrastuine gerestaureerd.