Nederfrankisch
Van Wikipedia
Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.
Oonder Nederfrankisch versteit me alle Frankische taole en dialekte die te noorde vaan de Benrather Linie ligke. Nao de vesteging vaan de Franke in de zuidelike Nederlen en 't midde vaan 't later Duitsland kós de Aajdhoegduitse expansie häör wèrk doen: zoe woorte de Frankische dialekte verdeild in Hoegfrankische, Middelfrankische en Nederfrankische vörm. 't Nederfrankisch maak daomèt ouch deil oet vaan 't Nederduits.
't Limburgs-Bergisch is 'n Nederfranksiche taol, en same mèt 't Braobants-Zuid-Gelders en 't Oosvlaoms behuurt 't tot de saorte Nederfrankisch mèt e relatief zwak Ingweoons substraot. Stèrker is 't Ingweoons substraot in 't Wes-Vlaoms, Ziews en Hollands (in oploupende volgorde) en hielemaol in 't Stadsfries. 't Nederlands, dat wèlt zègke de staanderdtaol, is ouch dudelik Ingweoonser es 't Limburgs. Ouch 't Afrikaans, gebaseerd op zeventiende-iews Hollands, is 'n Nederfranksiche taol.
Neet-Nederfrankische taole gesproke in de Nederlen en eve daoboete zien 't Fries en 't Nedersaksisch. In 't uterste zuidooste vaan Limburg vint me Middelfrankische dialekte, zuug ouch Kirchröadsj en Ripuarisch.
