Bataja de Dresda
From Wikipedia
Dopu de i bataj de Lutzen e de Bautzen, in del 1813, Napuleoon el decideva de firmaa una tregua de 10 setimann cont i leaa. La tregua la doveva permett a lù de riurganizass, ma i sò nemiss in del menter riessiven a mett insema un esercit de pusee de 400.000 omen formaa de 100.000 svedees comandaa del Bernadotte, de 100.000 prusiàn del Blücher e de 240.000 austriach e russ del Schwarzenberg.
I forz nemis marciaven per ciapaa la citaa de Dresda, la capidal de la Sasònia. El primm a rivaggh l'è staa el Maresciall francees Gouvion St Cyr cont 20.000 omen che trovaven la citaa sensaa difees e se meteven subit a l'opera per rinforzala.
El dì dopu, el 26 de agost, Schwarzenberg el rivava al comand de 160.000 omen e el tacava i francees cont un rapport de 8 omen contra vunn! El faseva però dj error strategich, e ij francees i combateven come indemoniaa de modu che in de l'istess dì el Napuleoon el podeva rivaa a la testa de alter 50.000 omen.
In tra ij leaa gh'era una gran confusion: el comand el decideva de retirass ma i sò generall i seguitaven l'atacch e riessiven a casciaa ij omen de St Cyr, stracch dopu de un dì de combatiment, foeura de tucc i sit strategich. El Napuleoon l'ordinava a la soa Guardia imperial de riciapaa i sit, cosa che la sucedeva denter de cinqu or. La bataja la continuava ancha el dì dopu, ma adess l'imperador el gh'aveva 150.000 omen a disposizion e el mandava 35.000 omen per part contra i fianch nemiis.
A la destra el maresciall Mortier el pasava e el casciava el nemiis costringendel a ritirass; a la sinistra el Murat el travolgeva i leaa, ciapand 24.000 prisoneer. A la fin del segond dì de bataja el Schwartzenberg el se ritirava. In tra i mort de la bataja gh'è de regurdaa anca el Moreau, un general francees pasaa cont i rùssi.
