Gilgamesch

Us der alemannische Wikipedia, der freie Dialäkt-Enzyklopedy

Johreszahle us dr früeie Antike si notorisch ungenau. Johreszahle in däm Artikel si Richtlinie und sötte nid z ernscht gnoh wärde: Für s dritte und zweite Johrduusig vor dr Ziitwändi gits verschideni Standard-Chronologie, wo um Johrzähnt vo enander abwiiche.

Dr Gilgamesch isch ä, mögligerwiis mythologische, König vo dr altmesopotamische Schdadt Uruk gsi.

[ändere] Dr hischdorisch Gilgamesch

In dr Antike het mä im Gilgamesch a hischdorischi Peron gseh. Är chunnt vor uf dr sumerische Königslischte as Bilgamesch und au ass er gege s Ändi vo dr zweite Früehdynaschdii (öbbe 2800 bis 2500 vor dr Ziitwändi) währed 123 Johr gregiert haig. Das isch ein vo de Gründ, ass mänggi anähme, ass er nit ä hischdorischi Person gsi isch. Wil aber hischdorischi Inschrifte vom e Köng vo Kisch, em Enmebaragesi, gfunde worde si, wo us dr gliiche Ziit schdamme, isch mä nüm ganz so sicher.^[1] In dr mesopotamische Dradition isch er aber as ein vo de gröschte sumerische König agluegt und au vergöttligt worde. Ein vo siine Zuenäme isch König vo dr Wält gsi.^[1] Uruk sig dank ihm zun erä Wiegi vo dr Zivilisation worde, wo d Arbetsdeilig, s Handwärk, d Bürokratii, s Bier und d Keilschrift erfunde worde si.

[ändere] D Gilgamesch Gschichte

Lang bevor die erschte Gilgamesch Gschichte im 22. Johrhundert vor dr Ziitwändi ufgschriibe worde si, und sogar no bevor dr Ziit wo die mesopotamisch Dradition ihm as Regierigsziit z Uruk git, het s Zylindersiigel gä wo ä Gilgameschfigur darschdelle, wo mit wilde Dier kämpft. Mögligerwiis isch die mythologisch Figur mit emä schböötere König Gilgamesch verschmolze.^[1]

Im Epos vom Gilgamesch, won a Kopii drvo uf Akkadisch uf 12 Dondafele in dr Bibliothek vom assyrische König Assurbanipal gfunde worden isch,^[2] wird verzellt wie dr Gilgamesch as Sohn vo dr Göttin Ninsun und em Halbgott Lugalbanda uf d Wält cho isch, und will er nit ganz göttlig gsi isch, isch er au schtärblig gsi. As Konig vo Uruk het er d Schdadt unabhängig gmacht und um sä ume än 11,3 Kilometer langi Muure baut, wo nün Meter hoch gsi isch.

[ändere] Quelle

1. ↑ ^{1,0 1,1 1,2} Stephanie Dalley, Myths from Mesopotamia: Creation, the Flood, Gilgamesh, and Others , Oxford University Press 1998, ISBN 0192835890
2. ↑ dtv-Lexikon, Deutscher Taschenbuch Verlag, München 1970, Band 7, S.274