Mantra

Us der alemannische Wikipedia, der freie Dialäkt-Enzyklopedy

Dialäkt: Ùndertòggeborg

E Mantra (Sanskrit: मन्त्र) isch e hailigi Silbe, en hailige Vers oder e Gibet i östliche Religione, so im Hinduismus, em Buddhismus oder Sikhismus. Si werdet i de Regle e bestimmti Azaal mol widerholt, oder au beliebeig villmol. D Öberliferig vo gwüssne Mantra werd ghaimbhalte, do me glaubt, ass si em Rezitator groosi magischi Chräft gend oder schädlich sind, wemer si falsch rezitiert. Anderi Mantra sind för all Lüt zuegänglich.

[ändere] Hinduismus

S wichtigste Mantra isch d Silbe Om oder Aum (ॐ auṃ, oṃ), wo i de indische Schrift en aignigs Zaiche het. Die Silbe het de Gott Brahma as erst s Usgsproche und drus use isch die ganzi Schöpfig entsande. Die Silbe het nünt z tue mitem christliche Wort "Amen".

S Mantra So-ham (सोऽहं , so'haṃ) tuet jede Mensch unbewusst ständig dur s Iischnufe und Uusschnufe widerhole und bedütet "Er isch Ich", da maint, as Gott i jedem Mensch wont und jede Mensch wont i Gott.

S Mantra Oṃ namo Bhagavate Vāsudevāya ("Om, Verehrig em Erhabene Vasudeva") isch en Aaruef an Gott Krischna.

S bekanntisti hinduistischi Mantra im Weste isch s Mahamantra ("s Gross Mantra") vo de Hare Krishna. Es stammt us de Kali-Santarana Upanischad und isch im 16. Joorhundert vom Chaitanya Mahaprabhu i ganz Indie bekannt worde, well er und sini Jünger dur s Land graist sind und ständig da Mantra gsunge hend. Wer s Maha-Mantra immer wider singt, erweckt d Liebi vo Krischna. Da Mantra cha nöd aifütig öbersetzt werde. De Rama isch wie de Krishna e Form (Avatar) vom Gott Vishnu und Hare het nu e symbolischi Bidütig.

Hare Kṛṣṇa Hare Kṛṣṇa

Kṛṣṇa Kṛṣṇa Hare Hare

Hare Rāma, Hare Rāma

Rāma Rāma Hare Hare

S Schanti-Mantra ("Frides-Mantra") söll d Aitracht zwüschet em spirituelle Schüeler und sim Lehrer stärche und isch öberliferet i de Yajurveda Taittiriya Upanischad:

ॐ सह नाववतु सह नौ भुनक्तु सह वीर्यं करवावहै तेजस्विनावधीतमस्तु मा विद्विषावहै ॐ शान्तिः शान्तिः शान्तिः

auṃ saha nāv avatu saha nau bhunaktu saha vīryaṃ karavāvahai tejasvi nāv adhītam astu mā vidviṣāvahai auṃ śāntiḥ śāntiḥ śāntiḥ

"Om, möged mer baid beschützt si, möged mer baid ernährt sii, möget mer Fähigkait erlange, mög üses Studium erlüchtet sii, mög nie Striit zwüschet üs ufchoo. Om, Fride, Fride, Fride!"

[ändere] Buddhismus

S bekanntisti buddhistische Mantra isch s Schutzmantra vom Avalokiteschvara. De Dalai Lama gelt as Inkarnation vo dem, drum isch es au sis Mantra. Da Mantra isch ka rains Sanskrit. Es lutet:

Om mani padme hum (ॐ मणि पद्मे हूँ oṃ maṇi padme hūṃ).

"Om, Juwel im Lotus, hum!"

Immer me bikannt im Weste werd s Mitlaidstantra vode Göttin Tara. Aber tibetischi Mönch und Lehrer rootet ab, da Mantra z bruuche, wemer nöd richtig iigfüert worden isch, wells sus zu negative Uuswürkige chöm.