Sprachfamilie

Us der alemannische Wikipedia, der freie Dialäkt-Enzyklopedy

Dialäkt: Züridütsch (See)

D Schprache vo dr Welt lönd sich in Schprachfamilie uufteile. E Schprachfamilie isch e Gruppe vo genetisch verwandte, das heisst vonere gmeinsame Vorgängerschprach (Protoschprach, Uurschprach, Gmeinschprach, Grundschprach) abschtammende Schprache. Bi mänge Schprachfamilie lönd sich die Uurschprache dur syschtematischi Vergliich vo de Einzelschprache bis zumene gwüsse Graad rekonschtruiere. Letschtlich isch es s Ziil vo dr Vergliichende Schprachwüsseschaft, zu jedere Schprachfamilie d Protoschprach z erschlüüsse.

Einzelni Forscher akzeptiered e genetischi Einheit (Schprachfamilie) nur dänn, wänn zwüsched ihre Mitglieder regelmässigi Luutentschprechige naazwiise sind (z.B. di bekannte Luutverschiebige vom Indogermanische zu de germanische Schprache). Anderi Forscher (z.B. de J. Greenberg) definiered Schprachfamilie vor allem dur umfassendi lexikalischi Vergliich, zu dene möglichscht viili Schprache vomene Gebiet oder sogar Kontinent heräzoge werded. Es hät geeh und git immer wieder Versuech, di einzelne etablierte Schprachfamilie weiter zu grössere Einheite, de sogenannte Makrofamilie zämezfasse (z.B. Nostratisch, Eurasiatisch, Dene-Kaukasisch). Die Versuech sind aber bisher i keim Fall so überzüügend, dass sie vonere Mehrheit vo de Forscher anerkännt worde wäred.

Di genetischi Klassifikation (also Iiteilig vo de Schprache nach ihrer Abschtammig) isch klar vo dr typologische Klassifikation nach schtrukturelle Merkmale (z.B. Flexion, Agglutination, Ergativität, Vokalharmonie u.a.) z underscheide. E geographischi Iiteilig vo Schprache chann zur Fechstschtellig vo Sprachbünde füehre, d Ähnlichkeite vo de Schprache vomene Schprachbund erchläred sich dur langfrischtige kulturelle Kontakt vo ihrne Schprecher, aber nöd us dr gmeinsame Abschtammig vo ihrne Schprache. (So sind di altaische Schprache offesichtlich en Schprachbund, wo di turkischi, mongolischi und tungusischi Schprachfamilie, viellicht au no Koreanisch und Japanisch umfasst.)

E Übersicht über d Schprachfamilie vo dr Welt büütet dr Artikel Schprachfamilie vo dr Welt.

[ändere] Lueg au

• Schprachfamilie vo dr Welt
• Makrofamilie
• Isolierti Schprache
• Unklassifizierti Schprache
• Altorientalischi Schprache
• Schprachbund
• Lischte vo Schprache

[ändere] Literatur

[ändere] Aktuelle Literatur

• Raymond C. Gordon (Hrsg.): Ethnologue: Languages of the World, 15. Aufl., Dallas: SIL, 2005, ISBN 1-55671-159-X
• Merritt Ruhlen: A Guide to the World's Languages, Volume 1: Classification. Stanford: Stanford University Press, 1987, Nachdruck 2000: ISBN 0-8047-1894-6
• Charles F. Voegelin & Florence M. Voegelin: Classification and Index of the World's Languages. New York: Elsevier, 1977, ISBN 0-444-00155-7

[ändere] Historischi Literatur

• Franz Nikolaus Finck: Die Sprachstämme des Erdkreises. Berlin: Teubner, 1909
• Ernst Kieckers: Die Sprachstämme der Erde. Heidelberg: Winter, 1931
• Wilhelm Schmidt: Die Sprachfamilien und Sprachenkreise der Erde, 1926, Nachdruck 1977: ISBN 3-87118-277-X

[ändere] Weblinks

• Ernst Kausen, Die Sprachfamilien der Welt (DOC)
• Sprachwissenschaftliche Homepage von Ernst Kausen
• Otto Weikopf, Die Welt der Sprachen - Die Sprachen der Welt