Cheografía de Cheorchia
De Biquipedia
Localizata entre dos continens, Cheorchia ha una muga de 723 km dan Rusia. As siguiens republicas/subdibisions de Rusia -d'ueste enta l'este- fan muga dan Cheorchia: Krasnodar Krai, Zircasia, Kabardino-Balkeria, Osetia d'o Norte-Alania, Inguchetia, Chechenia e Daguestán. Cheografica e culturalmén, Cheorchia ye considerata una nazión transcontinental.
O terrén ha tres partis distintas: á o norte e á o sur ye montañoso, incluyendo-bi, á o norte, a bertién sur de o Gran Caucaso, e á o sur parti de o Chicot Caucaso e os primers repuntes de as montañas d'Armenia e d'Anatolia; enta o zentro s'estendilla una ampla bal que prene a traza de plana costera chunto á o litoral de o mar Negro.
Prinzipals zidaz:
- Tblisi, 1.066.100 abitans (aria metropolitana 1.270.800 abitans)
- Kutaisi, 183.300 abitans
- Batumi, 116.00 abitans
O cuadro natural de Cheorchia n'ofre d'asabelos contrastes, que chustifican a suya dibisión en tres rechions:
- Transcaucasia ozidental, buelta enta o mar Negro e dominata per a bal de Rioni, de clima umido e rica bechetazión subtropical.
- Transcaucasia oriental més xuta en a parti trabesata per o río Kura, do aparixen as estepas semiaridas.
- Catena d'o Caucaso, que allí ha una bertién meridional, dan as suyas laderas e alteras tucas d'o Gran e d'o Chicot Caucaso, do n'ha de cheleras e de nieus eternas.
A populazión ye formata per una mayoría de cheorchians, que dan rusos, armenios, abjasians, adcharins e osetios. Se conzentra sopre tot enta l'ueste, en o pie de o Caucaso e á la orilla d'o mar Negro, do son bellas zidaz de zierta importanzia: Kutasai, en o meyo d'a bal de Rion, produtora de seda e lana; Poti, puerto d'o mar Negro, per do se saca o manganeso de Chiatura; Sujumi, capital de Abjasia, en o pie d'o Caucaso y estazión balnearia de o mar Negro, dan importans instituzions eszientificas e Batumi, capital d'Adcharia, puerto d'o mar Negro, esportador de petrolio e siede de refinerías.
