Mar Negro
De Biquipedia
O mar Negro ye un mar continental (interior) situato entre Europa y Asia, conoxita en l'antigüidá clasica como Pontus Euxinus. Comunica con o mar Mediterranio (á trabiés d'o mar de Marmara) por o Bosforo, y con o mar d'Azov por o estreito de Kerch. O prenzipal azidén cheografico d'as suyas costos ye a peninsula de Crimea.
Á trabiés d'o Bosforo bi ha una afluyenzia d'augua marina de 200 km³; netos añals; l'afluyenzia d'augua dulze (probenién d'as rechions que o rodian, espezialmén d'Europa zentral y oriental) ye d'unos 320 km³; netos añals. Os prenzipals ríos que i desembocan son o Danubio, o Dniéper y o Dniéster. O mar Negro tien más de 400.000 km²; de superfizie y una fundaria masima de 2.210 m.
O clima ye bariable entre o d'a parti norte, más freda y propio de l'artiga rusa, y o d'o sur, que remera o mediterranio. As costas ueste (Cheorchia) y sur (Turquía) tienen puntos mui plebidosos, aduyatos no nomás por a zirculazión global ueste-este sino por a presenzia de montañas chusto dezaga.
Os países bañatos por o mar Negro, con as prenzipals ziudaz costeras respeutibes, son:
- Turquía (Trebisonda, Samsun y Zonguldak; Istanbul se i troba chunto a la ribera d'o Bosforo)
- Bulgaria (Burgas y Varna)
- Rumanía (Constanţa)
- Ucraína (Odessa, Sebastopol, Yalta y Kerch)
- Rusia (Novorossisk y Sochi)
- Cheorchia (Sukhumi y Batumi)
Seguntes as luengas ofizials d'os estatos costers, o mar Negro tien os siguiens nombres: Karadeniz en turco, Черно море (Cherno More) en bulgaro, Marea Neagră; en rumanés, Чорне море (Txorne More) en ucrainés, Чёрное море (Chórnoie More) en ruso y შავი ზღვა (Shavi Zghva) en cheorchiano.
