Comenche
De Biquipedia
O Comenche (Comenge en grafía meyebal e en gascón; Comminges en franzés) ye un territorio de l'Alta Gascuña, n'o surueste d'a Republica franzesa. Ye un d'os territorios que mugan con l'Alto Aragón.
En l'actualidat, o Comenche ye troixiato puliticament e alministratiba entre os departamentos de Gers, l'Alta Garona e Arièja. Estoricament, puet parlar-se de dos Comenches:
- un Comenche gascón u Alto Comenche, més t'o sur, entre a Bigorra e o Coserán, que tien per lugar prinzipal Sant Bertrán de Comenche;
- un Comenche lenguadozián, dito Baixo Comenche u Comenche chicot, n'o nordeste, entre o Comenche gascón, o Coserán, o condato de Foix e l'Alto Lenguadoc.
O Comenche ye formato per paisez que tienen como eixe as altas bals d'a Garona e o suyo afluyent, o Pica. D'entre éls, o país de Luixón, que achunta o Comenche con a Ball de Benás per o pirinenco Portillón de Benás.
N'a Nobempopulania romana, probinzia que ixe nombre teneba per os nueu pueblos que i bibiban, o Comenche estió dito Convenae, e abió como capital o sitio galorromán de Lugdunum Convenarum, amanato ta l'actual Sant Bertrán de Comenche.
Conquiesto per os bisigodos, o Comenche pasó de fer parte d'o ducato d'Aquitania á estar un condato meyebal.
Den de 1498 ent'a Reboluzión franzesa, encara que os deszendients d'a filla d'o zaguer conte continoron dizindo-sen contes de Comenche, o condato ya no esistiba e o Comenche feba ya parte d'a Corona franzesa.
[editar] Se beiga tamién
- Condato de Comenche
- Gascuña
- Nobempopulania
