Ermita de Santa Catalina d'Araguás
De Biquipedia
A ermita de Santa Catalina corona o Tozal de Santa Catalina, clamato asinas per a ermita. Se troba á l'alto d'o tozal més altero d'a sierra d'Arro, á 1047m d'altaria, en o sarrato que desepara o termin monezipal d'O Pueyo d'Araguás en dos partes.
Ye una construizión chicolona e modesta, de piedras d'a redolada. Autualment només es bezinos d'o lugar d'Os Molins han conserbato ra tradizión de fer-be una romería cada 29 d'abril. Per a romería, cal caminar més de dos horas t'alto per a sierra ta plegar-be, e per l'usual, a resta de l'añada, ne fan uso es pastors como á corrala ta zerrar-be as bestias, ixe ye l'enchaque que se trobe en tan deplorable estato e que sía tan suzia per aintro.
Diz que Santa Catalina, Santa Engrazia e Santa Marina yeran tres chirmanas muito queritas d'entre eras. Diz tammién que ro suyo aimor yera puro e que en morir prefirioren de fer-lo bien chuntas de l'aimor que se teneban. Per ixo, en esta parte d'o Sobrarbe bi ha tres ermitas á l'alto de tres monts cuasi alineatos, que son consagratas ta cadaguna d'as tres chirmanas: Santa Catalina ye ra més oriental, en o tozal més altero d'a sierra d'Arro, Santa Engrazia finca á l'alto d'o dito Mont d'Araguás (858m) e Santa Marina prou més luen encara que besible d'o puesto, á l'alto d'a Punta Nabaín (1796m), á man d'Ascaso e Boltaña.
