Fueros d'Aragón
De Biquipedia
Estió en la añada de 1247 cuando lo rei Chaime I d'Aragón combocó Corz Chenerals d'o Reino en Uesca con a intinzión de continar a obra lechisladora d'a Corona y replegar en un solo decumento as normas que eban de rechir l'autibidá pribada y l'almenistrazión de chustizia. Os nombratos por os distintos Conzellos apreban allora os Fueros d'Aragón sobre l'alazet d'a obra churidica anterior reyalizata por o Bispe de Uesca, Vidal de Canellas que reculle una parti importán d'os fueros locals.
En o Prebilechio Reyal de 1283, Pietro III d'Aragón emologa os fueros y a suya aplicazión s'estendilla á tot o Reino.
Os fueros en o suyo orichen yeran pautatos, isto ye, fruito d'una aportazión común d'os Conzellos á los cualos o Rei daba a suya aprebazión. En un primer inte se relegoron y plegaron á tener dica doze libros en as rebisions de 1496, 1517 y 1542. En 1552 se reyaliza una gran refundizión, encluyendo as Oserbanzas. A zaguera faina de replega se'n fa en 1667. A faina de codificazión se beyó superada en muitos intes por as normas que ditaban as propias Corts d'Aragón y que se encorporaban como parti d'as normas churidicas d'o Reino.
L'aplicazión d'os fueros s'eslangue, á radiz d'a muerte de Chuan de Lanuza, Chustizia d'Aragón, ordenata por Zelipe II ta eliminar a formula de l'alcuerdo como alazet de redauzión d'os fueros. En 1592, as Corts aragonesas se reúnen en Tarazona y modifican sustancialmente as normas. Dende iste inte será o Rey quí diga o contenito. A unificazión con Castiella rematará con o dreito local: En 1707, Zelipe V abolió os fueros con a establida d'os Decretos de Nueba Planta que nomás dixan en un puesto secundario á los biellos fueros en a regulazión de custions particulars.
