Monesterio de Beruela
De Biquipedia
Lo Monesterio de Beruela ye un zentro zisterziense que se troba en lo termin de Bera de Moncayo.
Se fundó en 1146 con monches prozedens de lo monesterio franzés de Scala Dei imbitatos por don Pero d'Atarés, que donó los lugars de Beruela y Maderuela; donazión confirmata por Remón Berenguer IV. Con ixo Beruela estió lo primer monesterio zisterziense de la Corona d'Aragón.
Lur patrinonio s'enampló ascape, prenzipalment con donazions reyals:
- Remón Berenguer IV lis conziedió Mont Fort, Figueruelas y Alcalá de Moncayo.
- Sancho III de Castiella y Sancho VI de Nabarra tamién lis conzedioron muitos prebilechios.
- Alifonso II d'Aragón añadió á estos dominios Bera de Moncayo, Pozuelo, Purillosa e lo castiello de Ferrera. Los dos zaguers lugars los cambeoron por Bulbuent.
- Dimpués e d'atras maneras consiguioron Litago, Malexán, la grancha de Mazalcoraz, Billamayor (no lo de Zaragoza), y Ainzón.
Tamién tenioron eredaz por tot lo territorio aragonés, como pratos en Talamans, Tabuenca, Trasobars, canteras en Trasmoz y l'augua d'Añón.
