Ostabals-Asme

De Biquipedia

Ostabals-Asme (Izura-Azme en basco; Ostabat-Asme en franzés) ye un monezipio franzés, pertenexient á la rechión d'Aquitania, á lo departamento de los Perinés Atlanticos. Ye capital de la redolada Tierra d'Ostabals, Oztabarre u Pays d'Ostabarret de la Baxa Nabarra.

Contenius 1 Istoria 2 Nome 3 Patrimonio cultural 3.1 Patrimonio relichioso

[editar] Istoria

Dende lo sieglo X Ostabals ye una localidat important de lo Camín de San Chaime. En la cruzillata de diferens camins se trobaba en lo corazón d'un dispositibo de peache. En 1350 bi eba dos ostals, dos espitals y una bentena d'albergues pa acullir dica 5000 pelegrins.

Cremata en las guerras de relichión, en 1607 Enrique IV de Franzia autorizó la costruzión d'un mercato y tener una feria anual como « principale ville de commerce et de passage de notre dit Royaume de Navarre et Pais souverain de Béarn ».

Ostabals y Asme s'achuntoron lo 13 de chunio de 1841.

[editar] Nome

Lo toponimo Ostabat (o millor escrito Ostavath), que sennificarba en oczitán gascón Bal d'Hosta u Hosta Bal, amanexeba baxo las formas Ostebad (1167, cartulario de Sorde, pachina 45), Ostavayll (sieglo XII, colezión Duchesne, bolumen CXIV, fuello 161), Aussebat (1243, rôles gascons), Ostabailles (1383, tetulos de la Camara de Comtos), Sent-Johan d'Ostabat (1469, capetulo de Bayona), Ostabag e Hostabat (1472 pa estas dos formas, notarios de Labastida-Billafranca, lumero 2, fuelllo 22) e Nostre-Done de l'espitau d'Ostabat (1518, capetulo de Bayona). Aimery Picaud escribió en la suya Guía de lo Pelegrín que tres camins de San Chaime confluiban Ad hostavallam. Por lo que parix en gascón serba Ostabat (o millor escrito Ostavath) y en atras formas d'oczitán Ostavals.

Como pertenexió á lo reino de Nabarra se conox un esonimo nabarroaragonés. S'escribiba Ostavals u Ostauals (la U y V no yeran allora letras diferens) en una carta de omenache atorgata por Arnaldo de Luxa á fabor de lo rei Sancho lo Fuerte cuan este tornó la billa que allora teneba lo nome de l'autual redolada.

quando me tornastes esta villa de Ostavals a tal aviniença fiz con vos que io non faga fortaleza

Tamién lo trobamos en lo libro Peajes nabarros Pamplona (1351), Tudela (1365), Sangüesa: ¨

Arnauton de Ostavals

Lo toponimo Asme amanexeba baxo la forma Azme en 1481 en lo capetulo de Bayona.

[editar] Patrimonio cultural

[editar] Patrimonio relichioso

La cruz de Chibraltar, en la cruzillata de Chibraltar (tamién clamata cruzillata de Saint Sauveur) on los tres camins se troban, ye situata en lo collado entre los mons de Saint Salbador y Soyarce.

La capiella d'Elizafio s'alza á man de la cruzillata. Estió siñalata dimpués de 1964 con una losa con siñals pa orientar-se y una estela discoidal como las que se troban en los zementerios bascos. Se i achuntan los camins clamatos Via Turonensis, por Garis, Via Lemovicensis, por Sauveterre y Via Podensis por Navarrenx. Lo nome de Chibraltar no tién garra relazión con la ziudat omonica, y se crei que ye de lo basco Xibaltarre (campamento de chitans), u una deformazión basca de lo latín SALVATORE.