Peñagolosa
De Biquipedia
| Peñagolosa | |
 |
|
| Altaria | 1813 m |
| Latitú | 00º 20' 57 |
| Lonchitú | 40º 13' 33 |
| Situazión | Sierra de Gúdar, Castellón, á man de la muga con Tergüel |
| Cordelera | Sistema Iberico |
| Primera puyada | |
| Rota de puyada más fázil |
Dende a ermita de San Chuan de Peñagolosa |
La Tuca de la Peñagolosa (Penyagolosa en grafía SLA y en catalán) ye lo segundo pico més alto de lo País Balenzián con 1813 m sopre lo nibel de la mar, dezaga de lo Zerro Calderón en lo Lo Rincón d'Ademuz.
La Peñagolosa ye tan alta que se bei dende muitos quilometros arredol, tanto dende bellas zonas de Castellón e Gúdar-Chabalambre, como dende lo Tossal dels Tres Reis (Puertos de Bezeit).
La bechetazión ye prenzipalment pinetas que no son que una continazión de las pinetas de la Sierra de Gudar tergüelana. Lo barranc de la Pegunta ye una microreserba botanica y esiste un itinerario señalizato con los nomes d'as espezies. Á man de la Peñagolosa, por lo camín de Puerto Mingalbo, bi ha una selba de lo caxico Quercus pyrenaica, la unica de Castellón. Tamién bi ha una poblazión relita de Salamandra salamandra, a unica de Castellón, á lo costato de la probinzia de Tergüel on no bi n'ha garra zita confirmata. Por totas las suyas baluras naturals la Cheneralidat balenziana lo declaró Parque Natural en 2006.
Lo mazizo montañoso de la Peñagolosa fa de muga entre L'Alto Millars e L'Alcalatén, e doncas como lo Turbón fa de muga lingüistica, n'este caso entre lo catalán á lo norte e lo castellán á lo sur (antigament entre lo catalán e l'aragonés).
Á man de la tuca ye la ermita e antigo monesterio de San Chuan de Peñagolosa, lugar de pelegrinache pa los pelegrins de Las Useras. L'abundant torismo que rezibe los cabos de semana ye atra traza de pelegrinache.
[editar] Nome
S'han buscato diferens esplicazions de lo suyo nome como Penya Glaçosa por lo chelo que enantes duraba muito en a suya tuca, u PINNA LUGOSA fendo-la deribar de lo dios zelta Lug, e presuponiendo que yera una montaña sagrata. La ipotesis més fiable la fa deribar de PINNA COLOSA, por sonorizazión de la C- latina, e se puet notar més bien dende la bersant churra u bersant sur por la carretera que ba dende Puerto Mingalbo ta Castiello de Billamalefa, destacando muito entre los atros reliebes en cuesta como un Coloso.
