Pietro II d'Aragón
De Biquipedia
|
||
| Informazión | ||
|---|---|---|
| Rei en |  Aragón |
|
| dende | 1196 | |
| dica | 1213 | |
| Prezedito por | Alifonso II | |
| Suzedito por | Chaime I | |
| Naximiento | 1174 | |
| Muerte | 12 de setiembre de 1213 | |
Pietro II d'Aragón u Pero II d'Aragón, lo Catolico (1174 - †Murel 1213) estió Rei d'Aragón, Conte de Barzelona, Chirona, Osona, Besalú, Zerdaña, Pallars Chusán y Ribagorza (1196 - 1213), y siñor de Montpeller (1204-1213).
[editar] Aszendens y deszendens
Fillo e suzesor d'Alifonso lo Casto y de Sancha de Castiella á lo tron d'a Corona d'Aragón á la muerte d'o suyo pai en 1196.
Por o testamento d'Alifonso II lo Casto, Pietro eredaba Aragón y Cataluña, asinas como los condatos dependiens d'ella, mientres o suyo chirmán Alifonso II a Probenza.
O 15 de chunio de 1204 se casa con Maria de Montpeller y n'obtiene os dreitos sobre ista ziudá. Ascape intentó rebuyar-la, sin d'esito, ta casar-se con Maria de Montferrat, eredera d'o reino de Cherusalén. D'ista unión en naxioron:
- O infant Chaime I lo Conqueridor (1208-1276), rei d'Aragón y conte de Barzelona
- A infanta Sancha d'Aragón (1205-1206).
Tamién Pietro abió dos fillos ilechitimos:
- Pietro d'o Rei (?-1254, capellán en Lleida
- Constanza d'Aragón (?-1250), siñora d'Aitona, casata en 1220 con Guillem Ramon de Montcada, senescal de Cataluña.
L'añada 1204 se fazió coronar en Roma por o Papa Inozenzio III.
[editar] Politica peninsular
En Cataluña consiguió engayolar á Guerau de Cabrera, que eba ocupato os suyos dominios d'o condau d'Urgell.
Con Castiella as relazions estioron prou buenas, ya que yera fillato d'Alifonso VII de Castiella. Siñó un tratato que establiba la muga Agreda-Tarazona entre iste reino y Aragón y aduyó á lo suyo primo Alifonso VIII de Castiella contra os reis d'o Lión y de Nabarra.
Participó, con os reis iberics en a baralla d'as Landas de Tolosa, bitoria d'os cristians sobre os mezmuz que premitió a rapeda conquista d'Andaluzía.
[editar] Política oczitana
En setiembre de 1196 as Corz de Daroca confirmoron ista doble funzión: Pietro en Aragón y Alifonso en Probenza. Anque Pietro siempre estió intresato en a Probenza y os suyos estatos bezins. Asinas s'esplica como ya en o 1204 obligó á lo suyo chirmán Alifonso II de Probenza á fer as pazes con o conte Forcalquer, aliato de Pietro II.
En 1206 abió de luitar contra os abitans de Montpeller rebueltos contra la suya presona. Dende 1209 y con a conquista de Besiers y de Carcasona por parti de Simón de Monfort, protechió los siñors de Languedoc, recullió os omenaches d'os contes de Tolosa, Comenche y Foix, y intentó a reconziliazión que li demandaba Inozenzio III en o tema d'o catarismo. Dió a tutela d'o suyo fillo Chaime á Simón y preparó lo casorio entre Ramón VII de Tolosa y a suya chirmana Lionor. As suyas prebatinas de pazificazión no estioron buenas. Allora buscó a guerra contra Simón de Monfort. O 12 de setiembre de 1213, Pietro II intentó prener Murel, un pueblo d'o sur de Tolosa, an se cubillaban os omes de Simón. Os suyos caballers no podioron dentrar-ie y abioron a contraofensiba d'os franzeses sobre o suyo exerzito, muito más numeroso. Pietro II s'arriesgó y os omes de Simón que lo troboron en a batalla lo matoron. Os suyos caballers, beyendo a muerte d'o rei, fuyioron.
Apedecoron a Pietro en o priorato d'Espitalers de Sixena, establito en 1188 por Sancha de Castiella, a suya mai.
| Predezesor: Alifonso II |
Rei d'Aragón 1196 - 1213 |
Suzesor: Chaime I |
