Puent de San Urbiz
De Biquipedia
l'Uno coneixiu como á Puent de San Urbiz ó Pont de San Urbiz (también dito de San Urbez) ye un pont romanico á l'alto d'o riu Bellós á mientres d'o suyo trascruz per l'endreito clamato Congosto d'as Cambras, poquez zentenars de metros dimpués que o río en siga eixito d'a Bal d'Añisclo.
Amant de l'Ermita de San Urbiz, an se diz que hi bibiore o santo, e cuasi en a boca d'a Bal d'Añisclo iste ye uno d'es puestos més besitatos de tot o Parque Nazional d'Ordesa y d'as Tres Serols per a fazilidat de l'aczeso per carretera ent'á cuasi o mesmo pont. Ye per ixe motiu que as autoridaz responsables d'o Parque Nazional en habioron de construyir un pont muderno mesmo n'o canto de l'antigo t'afluxar-ne o transito de personas, que á trans d'iste s'endreitan ta l'Ermita que només pued estar chirada cuan se-hi trescruza.
O puesto an se troba ye singularment beroy y espeutacular, alzato á l'alto d'una foz profunda d'o Bellós per an o río baixa entre parez de peña á mientres que prenzipa o Congosto d'as Cambras. Ista ubicazión fazilitore segurament l'apareixenzia de falordias y rondallas populars sobre d'a suya construzión, parti alazetal de l'atrautibo d'o puesto, á més que l'orichen d'o culto enta San Urbiz en es lugars d'a redolada.
[editar] O miraglo d'o puent
O mite de San Urbiz en Aragón prenzipore talment astí perque, d'aucorde con a falordia, o santo estiore preguntato per es pastors d'a Bal de Bió, en una espluga d'a cuala l'ome santo hi meditaba, per bela maniera de trescruzar as bestias enta l'altra man d'a foz d'o congosto, y estiore alabez iste qui deixore caier un baculo aintro d'o forato d'a foz, o cualo yera muto més curto que no l'amplaria d'ixa breca, e per fuerzas d'un miraglo se diz que l'astilo per cuentas de baixar ent'o río, quedore concallato d'entre as dos leneras de canto y canto d'a canal, amostrant asinas o puesto més endicato t'alzar-be ro pont.
