Remiro I d'Aragón

Estió lo primer fillo de Sancho lo Gran, considerato borde per estar su mai Sancha d'Aibar, de a nopleza de as tierras d'Aibar. O suyo orichen ilechitimo ye conoxito grazias á una istoria an se conta como Remiro ye l'unico de os fillos de Sancho que aduya á la suya muller (e mesmo á os fillos d'ella). Agradexita, ella l'adouta como fillo suyo.

Remiro I emplegaba como siñal u signum regis a cruz d'Eneco Arista

Dimpués de a muerte de Sancho lo Gran, eredó lo trono lo suyo primer fillo lechitimo, Garzía de Náxera, que gubernaba en tot lo territorio de o pai. O suyo chirmán Remiro lo consideró menor d'edá e se proclamó baiulus (baile) en as tierras que eba rezebitas de su pai ta bibir de as rendas en o Condato d'Aragón. Bien luego se concararían en a batalla de Tafalla e Remiro dezidió d'emprenzipiar una nueba dinastía en Aragón. Dimpués de a muerte de o suyo chirmán Gonzalo en 1038, otenió tamién os reinos de Sobrarbe e Ribagorza per alcuerdo de os noples d'ixos reinos, que ofriban os territorios á lo Reino d'Aragón. Con tot, en a suya decumentazión autentica, o monarca aragonés se tetulaba como Remiro, fillo de o rei Sancho, sin fer uso de o tetulo de rei.

Tenió, difuera de o matrimonio e antis de contrayer-lo, un fillo natural de doña Amuña, clamato Sancho Remíriz (igual como lo suyo chirmán o rei) que estaría conte de Ribagorza.

Remiro I contrayó dos matrimonios suzesibos:

Con Chisberga (filla de o conte Bernardo Rocher de Bigorra) o día 22 d'agosto de 1036, que en o baltizo pasó á dizir-se Ermisenda. D'iste matrimonio, en naxioron:
- Sancho d'Aragón u Sancho Remíriz
- O bispe Garzía de Chaca
- A contesa Sancha, casata con Armengol III, conte d'Urchel
- Urraca, que estió moncha en Santa Cruz de as Serors
- Tresa