Torta
De Biquipedia
A torta ye un produto de repostería e masadería tepico d'Aragón, emparentau con os bizcochos, que presenta diferents formas enas diferents comarcas e redoladas.
Per un regular, a presentazión ye como un pan tobo de dimensions dibersas (de 30 dica 60 cm), plano, que se cueze más u menos en seguntes qué preparazión. A carateristica comuna de todas as tortas ye enna masada que s'emplega ta fer-las, que sole llebar farina, augua, debadura, buebo e una porzión d'azeite. A proporzión d'o buebo meso enna masada ye la prenzipal cosa que destingue las tortas ditas "de buebo", que son tan consumidas enno Sobrarbe.
Bellas preparazions prezisan d'espardir un poquet d'a zucre en alto d'a masada d'enantes no se meta ta'l forno de masar, ta fer que caramelize en chunto conna costra. Dempués, en quitar-la d'el forno, tamién pende á on que s'elabore, se n'esparde un poquet más ta dar-le l'aparienzia nebada que las fa de millor gana.
Enna Ribagorza, per contra, no se solen fer tan "crujientes", fendo-se forniar menos tiempos, e se sole estimar más de deixar a masada más toba con presentazión familiar d'un bizcocho. En esta zona, á más, s'afechan rayaduras d'a piel d'o limón como forma probablement más reziente, u d'a forma tradizional, con abellanas, almendras u nuez picadas en dintro.
