Agri Decumates

Aus Wikipedia

Der Àrtikl is im Dialekt „Owaöstareichisch“ gschriem worn.

Untam Kaisa Augusdus woa d Grenz fum Römische Raich da Rain und d Donau, dazwischn woa dés südwestliche Zipfi fu de Agri Decumates

A rekonsdruida Wåchduam, so wiara am Limes gschdãndn is

Ois Schuz fum Dekumatnlãnd hãm d Röma in retischn und in owageamanischn Limes baud

Rest fum Kastel Sablonetum am retischn Limes bai Ellingen in Mitlfrãnkn

Nåch 259 han d Alemannen in dé Region âidrunga und hãm si då niada låssn

Agri Decumates (Zénalãnd) woa de römische Bezaichnung fia dé Gégend zwischn Rain und Donau und auf da éntan Saitn fun Limes, dé im easchdn Joahundat nåch Grisdus Dail fum Römischn Raich woan is und åb n Joa 259 fu Alemannen bsézt woan is. De Röma hãm dé Region und dé åide Limes-Grenz neama zruk earowan kina, obwoi de Donau und da Rain nu bis ins 5. Joahundat d Grenz fum Römischn Raich woa.

[dro werkln] Da Nãm

Da Nãm agri decumates, dea auf Daidsch a mãnchmåi mid Dekumatnlãnd iwasézt wied, is neta in õana hisdoarischn Gwøn iwalifat, nemli im Tacitus saim Buach "Germania". Fu daidsche Wissnschåftla is éfda de Bedaitung "Zehentlãnd" foagschlång woan, oiso a åbhengigs Gebid wås jéds Joa a Zéntl fu da Eantn ois Tribut ålifan muas. [1] Englische Wissnschåftla glaum, das da Nãm åwa eha fum keltischn Woat decametos hea kimt und fia 10 keltische Schdem schded, dé wo doatn glébt hedn. A ãndane Daklearung warad, das si dés Woat auf an Oat oda a Schdåd beziagt, dén ma haid neama kenan und dea Decuma oda Decumum ghoassn håd. Soichane Woatbüdungen fu am Oatsnãm + ates fia a Region han nemli a wo ãndas zan findn. [2]

[dro werkln] Zaid fum Augustus

Untam Kaisa Augustus (27 foa - 14 nåch Grisdus) håd si s römische Raich bis an de Donau und in Rain ausbroat. Im Joa 15 foa Grisdus hãm de Röma Rezien (Raetia) ãgrifn und unta eana Heaschåft bråcht. Damid hãm de römischn Legionen a stratégisch guad fataidigboare Grenz entlãng fu de zwoa grosn Flis aufbaud. Da õanzige Nåchdail woa, das da Wég fu de Legionslåga am Rain zu dénan an da owan Donau håibwegs lãng woa und oiwai iwa Augusta Raurica (s haidige Basl in da Schwaiz) gfiad håd.

Zu deara Zaid hãm in da Region zwischn Deana und Rain de geamanischn Suebi glébt, dé åwa im Joa 9 foa Grisdus nåch Boiohaemum (s haidige Bemen in da Tschechai) åzong han. Danå han keltische Laid aus Galien in dé Gégend zong, obwoi s doat aussahåib fum Römischn Raich woan. Da Tacitus schraibt dazua:

Non numeraverim inter Germaniae populos, quamquam trans Rhenum Danuviumque consederint, eos qui decumates agros exercent: levissimus quisque Gallorum et inopia audax dubiae possessionis solum occupavere; mox limite acto promotisque praesidiis sinus imperii et pars provinciae habentur.

I dad néd zu de Föka fu Geamanien dazua zön, obwoi s zwischn Rain und Deana wonan, de wöchan de si in de Agri Decumates umadum draim: Laichtsinige Galia und frech woan duach Not, hãm si in dén zwaifihåftn Bsiz nidalåssn. Båid drauf is a Limes baud woan und de Gégend zu ana Ausbuchtung fum Raich dakleat woan und zu am Dail fu da Brovinz gmåcht woan. (Tacitus, Germania, 29,3)

[dro werkln] Bau fum Limes

Untam Kaisa Vespasian (69 -79 nåch Grisdus) hãm de Röma dé Gegend milidearisch bsézt und damid d Grundlåg fia a römische Bsidlung und in Bau fum Limes glégt. Untam Kaisa Domitian (81 - 96), im Su fum Vespasian, han duach de Agri Decumates a naiche Schdråssn baud woan, dé a schnöle Fabindung zwischn Argentoratum (Schdrassbuag), Mogontiacum (Mainz) und Augusta Vindelicorum (Augschbuag) dameglicht håd. Dé Schdråssn is schã åb n Joa 74 fu da Legio VIII Augusta baud woan. Im Joa 83 håd da Domitian a an grossn Griag géng de geamanischn Chatti gfiad, dé wo auf da östlichn Rainsaitn glébt hãm, géngiwa fu Mogontiacum (Mainz). Då woa unta ãndam de Legio I Adiutrix dabai und nåch eafoigraichn End fu dém Fødzug, wo de Röma woaschainli bis ins haidige Hessn fiagschdessn han, hãms mim Bau fum Limes zwischn Deana und Rain ãgfãnga.

[dro werkln] Römische Zaid

Nåchdém dé Röma duachn Limes de Grenz gsichat hãm, han in deara Gégend römische Sidlungen baud woan, wia Sumolecenna (Rottenburg am Neckar), Civitas Aurelia Aquensis (Baden-Baden), Lopodunum (Ladenburg) and Arae Flaviae (Rottweil ). Es san a grosse Bauanhéf fian Ãnbau fum Woaz ãglégt woan, de villae rusticae, de foa oim a Éssn fia s Milidea broduziad hãm. Bekãnt san a römische Bostschdazionen an de naichn Schdråssn und natiali an Haufn Kastel und Wåchdiam entlãng fum Limes. A Dail fu deara Region is zu da Brovinz Raetia dazua kema, nåch dea ma a dén Grenzåbschnid retischn Limes nend und da ãndane gressane Dail zu zua Brovinz Germania Superior kema.

De Gégend zwischn Deana und Rain håd zwoa Joahundat lãng recht floariad. Im Joa 185/186 håd s åwa a Revoitn gém, dé si géng de Presenz fu römischn Milidea in Argentoratum (Schdrassbuag) gricht håd.

D Befökarung fu de Agri Decumates woa zu deara Zaid a keltisch-galische. Laid fu mearane galische Schdém hãm si doat famischt und es håd natiali a römische Sidla gém und Laid aus ole Brovinzn fum römischn Raich, dé duachs Milidea oda in Hãndl in dé Gégend kema san. Fu de Markomanengriag (166-182) in Noricum und Raetia woa dé Gégend néd wiakli bedrofn, es is åwa zwéng dém a naiche Legion in de Gégend falågat woan, dé Legio III Italica, dé an da Donau a naichs Legionslåg in Castra Regina baud håd, s haidige Réngschbuag.

[dro werkln] Alemanen

Das dé ruign Zaidn båid foabai san, håd si zan easchdn Må im Joa 233 zoagt, wo de Alamanni âigfåin san und de Region fawüst hãm. Im Joa 259 hãm de Alemanen wida in Limes duachbrocha und hãm si désmåi sogoa in de Agri Decumates niada låssn. S römische Milidea håd in Limes aufgém. De Alemanen han åwa zu mindest aus de ãngrenzendn Gégendn südlich fu da Deana und westlich fum Rain zruk drim wean kina. Said da Zaid fum Kaisa Gallienus (259-260), in dea da gãnze Westn fum Römischn Raich im Wüawi woa, san de Agri Decumates neama Dail fum Römischn Raich gwén. Es håd zwoa untam Kaisa Aurelian (270-275) nu amåi an gachn milidearischn Foaschdos bis zan åidn Limes gém, åwa auf Daua woa dé Gégend fia de Röma faloan und is åb dãn neama zruk earowat woan.

Untam Kaisa Probus (282) hãm de Röma dé Region endgültig aufgém und said dém woa s fu de Alemanen besidlt, aigentli kã ma sogoa sång bis haid. De Alemanen hãm si schbéda nu mea in Sidn ausbroat, bis an dn Bodnse und in d haidige Schwaiz. D römischn Sidla san åwa néd ole auf õan Schlåg wéga, sondan mitn unta de Alemanen håd s nu waida römische Sidlungen gém, dé in de Agri Decumates bis ins 5. Joahundat duach Gwøn bélégt wean kinan.