Legio III Italica

Aus Wikipedia

Der Àrtikl is im Dialekt „Owaöstareichisch“ gschriem worn.

A Antoninianus dea untam Gallienus im Joa 260 brégt fia d drite italische Legion woan is. Auf da rechtn Saitn siagt ma in Schdoach, s Legionssimbol fu da III Italica und es schded "VI Pia, VI Fidelis" (6 Måi blichtbewust, 6 Måi drai/loijal)

D Legio III Italica (drite italische Legion) woa a römische Legion, dé fum Kaisa Marcus Aurelius im Joa 165 nåch Grisdus gemainsãm mid da Legio II Italica in Italien ausghom woan is, zu ana Zaid wo s römische Raich glaichzaitig am Limes in Geamanien, an da Donau géng de Markomanen und im Ostn géng de Partha im Griag woa. D drite italische woa baim Markomanen-Griag an da Donau dabai und håd schbéda d Grenz fum römischn Raich in da Brovinz Raetia II bewåcht und s Hauptquartia in Castra Regina (Réngschbuag) ghåbt.

[dro werkln] Gschicht

D Porta Praetoria fum römischn Låga in Castra Regina

D Schüd-Foam fu da Tertiani Italica, da Comitatensis Legion dé aus da III Italica entschdãndn is.

[dro werkln] Markomanen-Griag fum Marcus Aurelius

Glai nåchdém d drite italische Legion grünt woan is, han im Joa 166 de Markomanen iwa d Donau ins römische Raich âigfåin und hãm de Brovinz Noricum und Pannonien fawüst. Da Kaisa Marcus Aurelius håd mid mearane Legionen de Géngofensifn gschdart, dé in da Gschicht ois Markomanen-Griag bekãnt is. Unta saim Befö han d Legio III Italica sowia de II Italica und de I Adiutrix an de Donau zong und hãm de Markomanen zruk drengt. Da Marcus Aurelius håd de meara Zaid fu saina Regentschåft an da Donau in Carnuntum fabråcht und is im Joa 180 woaschainli sogoa doat in da Gégend in Vindobona, im haiding Wean, gschdoam.

[dro werkln] Untam Septimus Severus

Im Biagagriag fum Joa 193 håd d Legio III Italica in Septimus Severus untaschdizt und eam ghoifn saine Gégna zan schlång, zeascht in Pertinax und in Didius Julianus, dãn in Pescennius Niger und in Clodius Albinus. In deara Zaid woa de drite italische Legion waid wég fu da Donau, in Italien und im Ostn fum römischn Raich.De Loijalidet zan Kaisa håd si a nåch n Dod fum Septimus Severus ghåidn und d Legio III Italica håd fia sain Nåchfoiga in Caracalla in saim Fødzug géng de Alamannen im Joa 213 kempft.

[dro werkln] Im 3. Joahundat

Said da kuazn Regentschåft fum jungen Kaisa Gordianus III., dea nåchn Dod fum Maximinus Thrax ois 13jariga römischa Kaisa woan is, håd de drite italische Legion in Bainãmen Gordiania drãng. Wås åwa då genau dafia da Grund woa und wo de Legion fuan Gordianus III. âigrifn oda kempft håd woas ma ned. Es kãn åwa sâi das dé Legion in dea Zaid gãns im Ostn baim Fødzug fum Gordianus III. géng des Sassanidn Raich gfiad håd (243-244).

Danåch woa d Legio III Italica auf jédn Fåi wida in Réngschbuag und woa doat in de faschidanen Måchtkemp involviad dé im 3. Joahundat oft fu de mechding und schdoakn Donaulegionen entschidn woan san. Ma woas dass fian Gallienus géng sain Rivaln in Postumus kempft håd und dés wéng in Eantitl VI Pia VI Fidelis griagt håd, wås so fü wia "6 Må blichtbewust, 6 Måi drai" hoast. Schbéda håd is sogoa VII Pia VII Fidelis draus woan. Ma woas a das d III Italica im Joa 273 baim Fødzug fum Kaisa Aurelianus géng de Königin Zenobia im Ostn fum Raich dabai woan, obwoi s Hauptquartia oiwai in Réngschbuag blim is.

[dro werkln] Am End fum Römischn Raich

De drite italische Legion wiad a am End fum 4. Joahundat nu ois Dail fu da römischn Schdraidmåcht an da Donau fu de Gwøn aufglist. In deara Zaid woa s åwa kõa komplete Legion mea sondan neta a comitatensis Ainhaid, dé im Hintalãnd fum Limes schdazioniad woa. Danå woas ma laida neama recht fü wås aus ia woan is und wo s aufglest woan is oda im Kãmpf unta gãnga is.

[dro werkln] Schau a unta

• Legio II Italica
• Legio I Noricorum
• Legio XV Apollinaris
• Castra Regina

[dro werkln] Gwøn

• www.livius.org Legio III Italica
• LEGIO TERTIA ITALICA ANTONINIANA - Saitn fu ana Reenactment-Grupm in Réngschbuag
• Legio III Italica - Saitn fu ana Reenactment-Grupm in de USA