Legio II Italica
Aus Wikipedia
 |
Der Àrtikl is im Dialekt „Owaöstareichisch“ gschriem worn. | |
D Legio II Italica (zwoate italische Legion) woa a römische Legion, dé fum Kaisa Marcus Aurelius im Joa 165 nåch Grisdus gemainsãm mid da Legio III Italica in Italien ausghom woan is, zu ana Zaid wo s römische Raich glaichzaitig am Limes in Geamanien, an da Donau géng de Markomanen und im Ostn géng de Partha im Griag woa. D zwoate italische Legion woa bis ins 5. Joahundat in da Brovinz Noricum schdazioniad und doat foa oim im haiding Owaésdaraich und in Nidabaian südlich fu da Donau.
Inhaltsverzeichnis |
[dro werkln] Gschicht
[dro werkln] Noricum
S Haupteinsåzgebid fu da Legio II Italica woa in Noricum und d Legion håd doat de Donaugrenz fum römischn Raich fadaidigt und woa untam Marcus Aurelius in dn Griag géng de Markomanen dabai. S Legionssimbol woa s Woif-Waiwi mid de Zwiling Romulus und Remus, wås a a Zaichn dafia woa, dass dé Legion diarekt in Italien ausghom woan is und zu mindest am Ãfãng aus römische Soidådn beschdãndn håd. Im Joa 180 is d zwoate italische Legion fix in Lauriacum schdazioniad woan, am römischn Oat und Kastel dea baim haiding Ens in Owaésdaraich gléng is.
[dro werkln] Untam Septimus Severus
Im Joa 193 wiad nåch da Eamoadung fum Kaisa Pertinax wiad in Carnuntum da Genaral Septimus Severus fu de an da Donau schdazioniadn Legionen zum naichn Kaisa ausgruafn und d II Italica maschiad gemainsãm mid eam nåch Rom im Kãmpf um dé Foamåcht im römischn Raich. Nåchdém si da Septimus Severus ois naicha Kaisa duachgsézt håd, wiad d zwoate italische Legion fu eam nåch Ostn gschikt zeascht géng d Rebeljon fum Pescennius Niger und dãn géngan Clodius Albinus. Nåchdém baide nidagschlång woan han, is d Secunda Italica baim Septumus Severus saim Griang géng de persischn Partha dabai.
[dro werkln] Im 3. Joahundat
Im 3. Joahundat woa de II Italica baim Maximinus sain Griag in Dacia dabai und nåch de iwalifatn Gwøn zan schliassn, mindestns bai õam Fødzug géng de Westgotn. Baim Konflikt zwischn am Kaisa Gallienus und saim Rivaln in Postumus is d zwoate italische Legion in Kaisa drai blim und håd auf dés aufi in Eantitl Pia V Fidelis V (fimf Måi blichtbewust, fimf Måi in Kaisa drai) griagt. A bai schbédane inteane Konflikt im römischn Raich woa de Legion oiwai auf da Saitn fum jéwailing Kaisa und håd si nia an am Milideabutsch bedailigt.
[dro werkln] Untam Diocletian
In da Zaid fum Diocletian woa d II Italica oiwai nu in Lauriacum in Noricum schdazioniad, wo zu iara Untaschdüzung d naiche Legio I Noricorum aufgschdöd woan is. In deara Zaid is a zua Bewåchung fu da Donau zusezli a nu a Schifsflotn âigricht woan, dé in Favianis/Mautern und Lauriacum/Loach schdazioniad woa.
[dro werkln] Untam Konstantin
A Genarazion schbeda is a Untaåbdailung fu da zwoatn italischn Legion nåch Divitia/Deutz an d Raingrenz åbkomandiad woan, dé s doatige römische Kastel auf da géngüwaligadn Saitn fu Köln bewåcht håd. Aus deara Ainhaid is schbéda a aigene Legion gmåcht woan, de Legio II Italica Divitensium, dé nåchhea nu a wichdige Roin gschbüd håd und gemainsãm mim schbédan Kaisa Konstatin I fum Rain nåch Rom maschiad is und bai da berümtn Schlåcht an da Milvinischn Brukn im Joa 312 dabai woa.
[dro werkln] Am End fum Römischn Raich
Im 4. Joahundat håd dé Dopilegion II Italica zua mobiln Fødarme ghead, dé im Hintalãnd schdazioniad woa und bai ana Bedroung doat hî gschikt woan is, wo Geamanen üwan Limes drüwa san. Am End fum römischn Raich im 5. Joahundat wiad in da lézdn faleslichn milidearischn Gwøn, da Notitia Dignitatum, d Legio II Italica Pia Fidelis ois oiwai nu an da Donau in Lauriacum schdazioniad eawent, wo s gemainsãm mid da I Noricorum de Donaugrenz fadaidigt håd. Danå faliad si jéde Schbua, im Buach fum Lem fum Hailing Severin fu Noricum, da Vita Sancti Severini, gibt s kõan Hinwais mea, das nu a intakde Legion an da Donau gwén wa.
[dro werkln] Schau a unta
[dro werkln] Gwøn
- en.Wikipedia: Legio II Italica (gseng am 12. Nofemba 2007)
- www.livius.org Legio II Italica (auf Englisch)
- Forum OÖ. Geschichte - 1. und 2. Jahrhundert
- www.imperiumromanum.com LEGIO II ITALICA
