Robert Mugabe
Aus Wikipedia
 |
Der Àrtikl is im Dialekt „Owaöstareichisch“ gschriem worn. | |
Da Robert Gabriel Mugabe (*21. Februar 1924) is seit 1980 s'Stååtsowahaupt und seitm 87a-Joa Stååtspräsident vu Simbabwe, am Laund im südlichn Afrika. Außadem is ea da Aunführa vu da Partei ZANU. Am Aufaung hod ma in eam nu an guadn Führa und an Hoffnungsträga vum schworzafrikanischn Raum gseng, heid steht ea oba in da Kritik, weil sei Führungsstil is oft diktatorisch und ma glaubt dass ea obsichtlich Hungasnöte und so Zeig in seim Laund passian losst. Außadem nimmt as mit de Menschnrechte ned gaunz so genau, wesweng sei Laund ausm Commonwealth ausgschlossn woan is und ea außa zu UNO-Vaaunstoitungen nimma ind Eiropäische Union eireisn deaf.
Inhaltsverzeichnis |
[dro werkln] S'Lem vum Mugabe
Da Mugabe is da Region Fort-Victoria (heit: Masvingo) afd Wöd kemma und im heidign Zvimba-Distrikt afgwoxn. Eazong woan is a streng katholisch und es is bei de Jesuitn ind Schui gaunga. Mit 17 Joa hod a in Südafrika an da Fort-Hare-Uni zum Studian augfaunga und hod daun weidagmocht an Unis in Driefontein, Salisbury, Gwelo, Tansania und Accra, wo ea af sei spädare Frau, d'Sally Hayfron gstoßn is. 1984 hod a in Ehrndokta vu da Uni in Edinburgh kriagt, dea eam 2007 weng seina Politik wieda gnumma woan is. Außadem is a seit 1994 a Knight Commander vum Order of the British Empire.
[dro werkln] Werdegaung
[dro werkln] Guerillakämpfa
Nochm Studium in Accra is a noch Südrhodesien, des woa s'domolige Simbabwe, zruckgaunga und is ois bekennenda Marxist da "Nazjonaldemokratischn Partei" beitredn. 1963 hod a de Partei valossn damit a mit aundare de ZANU-Partei gründn hot kina, bei wöchana ea imma schau im militantn Flügi si aufghoidn hot.
1964 hod ma eam und aundare Revoluzjonäre vahoft und 10 Joa laung eigsperrt. In deara Zeit hod a a Feanstudium gmocht und damit via akademische Grade eawoam. Nochdemsn wieda freilossn hom, hod a wieda in militantn Teil vu da ZANU üwanumma und is 1974 noch Mosambik ins Asyl gaunga vu wo aus ea de weiße Mindaheitsregierung in Simbabwe bekämpfn woit. 1976 hom se de zwoa Partein, s'ZANU und s'ZAPU (d'friahan Nazjonaldemokratn), zua Patriotischn Front wiedavareint.
[dro werkln] Hoha Politika
1979 hom de Britn s'rhodesische Reschiim duach a Koalizjonsregiarung easetzt und a Joa späda hots de eastn Parlamentswoina gem, bei denen im Mugabe sei ZANU üqaroschndaweis gwunga hod und ea hod damit Premjehminista wern kina. Seine erstn Vasprechn noch da Woi woan, dass a in Konflikt zwischn de schwoazn und weißn Leid aufhean lossn wü und dass ma stottdem midanaunda ind Zukunft schaun soi. Und ea hod wiakli gschaut dass a de Lemsvahötnisse vu de Schwoazn vabessat und s'Büüdungssystem vu Simbabwe is unta seina Führung s'beste vum südlichn Afrika woan. Drum hod sogoa da Jimmy Carter gsogt, dass de Woi vum Mugabe a guade Entscheidung woa; de weißn Siedla hom olladings massnweis Simbabwe valossn.
In dera Zeit hod a nu mit da ZAPU koaliat. 1982 is de Zusaummenoabeit afglöst woan und da ZAPU-Chef Joshua Nkomo hod d'Regiaung valossn, weil Woffnloga gfundn woan san, de aungebli vu da ZAPU auglegt woan san. Draufhi hod da Mugabe de Ndebele, a Voiksgrppm de wos mim Nkomo sympatisiat hot, vafoing lossn wobei um de zwanzgtausnd vu denen ums Lem kemma san. Da Mugabe hod de klane Krise ausgnutzt um sei Mocht zum festing. 1985 hom se si wieda vatrong und da Nkomo is wieda sei Vize woan. 1987 hod ma s'Aumt vum Premjehminista obgschofft und da Mugabe is stottdessn Stååtspräsident woan. 1990 hods a Obstimmung gem, ob a Einparteiensystem eigfüat wern soit, wos aa zugunstn vum Mugabe ausgaunga is; des Eagebnis umzusetzn hod a si daun aus Aungst voa Kapitalflucht oba doch net traut. 1990 und 96 is ea bei de Woin bstätigt woan.
1991 hod a augfaunga, in simbabwischn Moakt z'refoamian. Außadem hod a mit da Schwulnhetz augfaunga, wei des "unafrikanisch" sei soid. Af amoi hod ma ois Schwula zehn Joa ins Gfängnis kemma kina. Da Mugabe woit damit AIDS bekämpfn, hod daduach oba enorm an Aunsehn valoan. Draufhi hod da Mugabe an Kriag gengan Kongo augfaunga, wos de Stååtsausgobn ind Heh schiaßn lossn hod.
Um an Mugabe wiad a oaga Peasonenkult betrim: Sein Stammbaum füat ma zu de Kini vum oidn Simbabwe-Kinigreich zruck. Propagangdaplakate san so aufbaut, wia waun ea a Gottkini warat, dea wos fia d'Fruchtboakeit vu seim Voik zuaständig is. Lobhymnen, de wos de Schüla lerna miassn, preisn seine "Leistungen". In Gedichtn wird sei üwarognde Intelligenz gfeiat. Da Mugabe vagleicht si oba net netta mit de oidn Kini sundan aa mim Adolf Hitler, dem sein berühmtn Boat ea aa schau ghobt hod.
[dro werkln] Politische Aktivitätn
[dro werkln] Homosexualität
Wia obn schau steht, hod ea d'Homosexualität "unafrikanisch" empfundn und deshoib unta Strof gstööt. Ea hod se docht, dass d'Homosexualität ausm Westn impoatiat woan is und fiad Aids-Pandemie vaauntwoatli is. Homosexuelle Leid san fia eam "mindaweatiga wia Schweindln" und drum kaunst in Simbabwe seither 10 Joa im Gfängnis laundn netta weist schwul bist.
So gaunz nembei hod ea an politischn Rivaln, sein Aumtsvoagänga, in Canaan Banana, weng Schwulheit voa Gricht gstööt, worauf dea noch Südafrika gflicht is weil dea um sei Lem gfiacht hod.
[dro werkln] Laundrefoam
Wia da Mugabe Premjeh woan is, hom 4000 weiße Bauan 70% vu da Flächn vu Simbabwe bwiatschoftet. Da Mugabe hod denen am Aufaung vasprochn, dass a eana nix afoch so wegnemma wiad sondan dass des schrittweis, gmiatlich, freiwillig und mit augmessenen Entschädigungen gändat wern soite.
Uasprüngli hom de weißn Farma in de Schwoazn s'Laund gwoitsaum weggagnumma, und daun s'rhodesische Apartheidreschiim untam Ian Smith untastützt. Wia daun da Mugabe and Mocht kemma is, hod ea gsogt ea kümmat si drum, hod oba voaeast amoi bis 1990 goa nix dau.
1990 isses daun oba los gaunga. D'Leid haum sowoi gsogt, dass des a Schritt ind richtige Richtung is ois aa dass ea s'Laund netta an de Leid umvateilt de wos eam sei Politik mitgengan und dass de Leid de wos s'Laund brauchatn nix kriang. Voa oim seitm 2000a-Joa soit des reglmäßig passian. In dem Prozess is's zu Ausschreitungen kemma, bei denen sowoi Weiße ois aa Schwoaze draufgaunga san.
Wia daun vum Mugabe aufghetzte Veteranen augfaunga hom, dass's weiße Farma umbringan, isses westliche Regiarungen zvü woan und se hom eam d'Einreise ind EU vabotn. Sogoa schwoaze Kritika hom dozumois bstätigt, dass da Mugabe s'weiße Reschiim net afoch beseitigt hod sondan duach a neichs eastzn lossn hod.
Ois Konsequenz is d'laundwiatschoftliche Produktivität vu Simbabwe kumplett zsaummbrocha. De neichn Farma hom si nämli mit da Laundwiatschoft oft ned auskennt und duach Misswiatschoft, Zastörung vu Fööda und de Sperrungen vu Kontn im Auslaund is's beagob gaunga. Zum Beispü is d'Tabakprodukuzjon, d'friahare Haupteinnauhmequön vu Simbabwe, um 75% zruckgaunga; d'Maisprodukzjon deckt netta nu a Drittl vum Eignbedoaf. Weil ausländische Medien in Simbabwe oba net zuaglossn san, wissn ma goa net, wia oag dass's wiakli woa. In da Foige san in da friahan Koankaumma vum südlichn Afrika Hungasnöte ausbrocha und s'Droad muaß tonnenweis impoatiat wean, weil nu dazua a Dürreperiode eigsetzt hod. Seit a poa Joa gibts weng dea Politik außadem a iasinnige Inflation.
Vü vo de Leid de wos weng dem Gaunzn s'Laund valossn hom, san ois eafoarene Laundoabeita in Sambia und Südafrika wieda aufgnumma woan.
[dro werkln] Woifööschungen
2002 hod da Mugabe wieda amoi a Woi gwunga und zwoa gengan Morgan Tsvangirai vu da Bewegung fia an demokratischn Waundl mit 55% vu de Stimmen. Da Mugabe soit dabei oba gezielt Leid vu da WOi feanghoitn hom, de woascheinli geng eam gstimmt hättn. In Sieg hod da Mugabe nämli ausschliaßli im Eagebnis vum Mashonalaund zum vadaunga, wos de absolute Mugabe-Hochbuag is.
2005 hod sei ZANU d'Parlamentswoin gwunga und dabei 78 vu 120 wööboare Sitze und de 30 diarekt vum Mugabe vagebenen Mandate kriagt. Daduach hod da Mugabe im Moment a gmiatliche Zwadrittlmeaheit. D'USA und d'EU hom wieda gschrian, dass des a Woibetrug woa. Es soi nämli massive Drohungen de Wähla gengüba gem hom und außadem Eagebnisfööschung. Ausländische Beobachta hom oba net zuaschau deafn.
[dro werkln] Untadrückung vu da Bevöikarung
Laut BBC soi da Mugabe 2001 "Jugendbüüdungsstättn" afgmocht hom, de in Wiaklichkeit Foitaloga san. D'Jugendlichn wean duat umeazong damits späda geng im Mugabe seine Gegna voagengan. Duat wiad eana laut BBC beibrocht wia s'Foitan am bestn geht und wia ma Leid umbringa kau. A poa vu de Insaßn wean sogoa ois Vasuachskarnickl heagnumma und daun ois psychisch komplett gschädigte wieda freiglossn. Da Mugabe wü damit woascheinli d'Jugend psychisch hinigmochn und gfügig mochn.
D'Operazjon Murambatsvina ("Müllentsorgung") is 2005 a Programm gwen, mit dem da Mugabe d'Slums und illegale Hüttn und Häusa vu Harare und aundare greßare Städt niadagwoizt und vabrennt hod. In de niadagwoiztn Stodtteile lem übawiegnd Opposizjonsaunhänga, de af de Oat und Weisn nu stäaka gspian soitn, wea do am Ruada sitzt. Vu dera Operazjon san mearare Miljonen Leid betroffn gwesn.
[dro werkln] Weidare Infos
- Stephen Chan: Robert Mugabe: A Life of Power and Violence. London, 2003
