Референдум 2004

Од Википедија, слободна енциклопедија

Плакат за собирање 100.000 потписи за референдумот

Референдумот од 2004 година е распишан со цел изјаснување околу ново-усвоениот закон за нова територијална поделба на Република Македонија. Согласно Уставот на Република Македонија и Законот за референдум и граѓанска иницијатива објавен во Службен весник на РМ бр. 24/98, а по барање на 180.545 граѓани на Република Македонија со право на глас, Собранието на Република Македонија го распиша задолжителниот референдум за територијалната организација на Република Македонија. Референдумот се одржа на 7 ноември 2004.

На овој референдум гласачите со ЗА и ПРОТИВ се изјаснуваа по прашањето:

Дали сте за територијалната организација на локалната самоуправа (општините и градот Скопје) утврдена со Законот за територијалната поделба на Република Македонија и определување на подрачјата на единиците на локалната самоуправа (“Службен весник на Република Македонија” бр.49/96) и Законот за градот Скопје (“Службен весник на Република Македонија бр.49/96)?

Иницијатор за собирање на потписите беше Светскиот македонски конгрес.

[уреди] Изборна статистика

Право на глас имаa 1.709.536 лица, запишани во Избирачкиот список.

Гласањето се одвивало на 2.973 гласачки места, при што целата територија на Република Македонија беше една изборна единица.

Изборни органи што го спроведувале референдумот се:

- Државната изборна комисија, 34 општински изборни комисии, 2.973 избирачки одбори.

[уреди] Политички импликации

Митинг за поддршка на референдумот

Зад иницијативата за референдум застана целокупниот опозиционен блок, додека владеачката коалиција предводена од СДСМ, стравувајќи од етнички поделби и тензии, се противеше на референдумската иницијатива и бараше граѓаните да не гласаат на референдумот. Меѓународната заедница исто така негативно се произнесе по референдумската иницијатива. Најгласни во тоа барањето беа САД кои 2 дена пред референдумот ја признаа Република Македонија под уставното име.