രാഹുവും കേതുവും
വിക്കിപീഡിയ, ഒരു സ്വതന്ത്ര വിജ്ഞാനകോശം.
ഭൂമിയില്‍ നിന്ന്‌ നിരീക്ഷിക്കുമ്പോള്‍ രാശിചക്രത്തിലൂടെ സൂര്യനും ചന്ദ്രനും മറ്റ്‌ ഗ്രഹങ്ങളും ഭൂമിക്ക്‌ ചുറ്റും വലം വയ്ക്കുന്നതായി നമുക്ക്‌ തോന്നുന്നു. ചന്ദ്രന്‍ രാശിചക്രത്തിലൂടെയാണ് ഭൂമിയെ വലം വയ്ക്കുന്നത്‌ എങ്കിലും സൂര്യന്‍ സഞ്ചരിക്കുന്ന അതേ തലത്തിലൂടെ (Plane) അല്ല ചന്ദ്രന്‍ ഭൂമിയെ വലം വയ്ക്കുന്നത്‌. സൂര്യപഥവും ചന്ദ്രപഥവും തമ്മില്‍ ഏകദേശം 5 ഡിഗ്രിയുടെ വ്യത്യാസം ഉണ്ട്‌. ഇതു കാരണം രണ്ട്‌ ബിന്ദുക്കളില്‍ മാത്രമേ സൂര്യപഥവും ചന്ദ്രപഥവും തമ്മില്‍ കൂട്ടിമുട്ടുകയുള്ളൂ. ഈ ബിന്ദുക്കളെയാണ് രാഹുവും കേതുവും എന്ന്‌ വിളിക്കുന്നത്‌. സൂര്യനും ഭൂമിയും ചന്ദ്രനും നേര്‍‌രേഖയിലെത്തി ഗ്രഹണങ്ങള്‍ സംഭവിക്കുന്നത് രാഹുവിലോ കേതുവിലോ ആണ്.
ചന്ദ്രന്‍ തെക്ക്‌ നിന്ന്‌ വടക്കോട്ട്‌ സൂര്യപഥത്തെ മുറിച്ച്‌ കടക്കുന്ന ബിന്ദുവിനെ നമ്മുടെ പൂര്‍വ്വികര്‍ രാഹു(Ascending Node) എന്ന്‌ വിളിച്ചു. ഇതിന്റെ നേരെ എതിര്‍വശത്ത്‌ ചന്ദ്രന്‍ വടക്ക്‌ നിന്ന്‌ തെക്കോട്ട് സൂര്യപഥത്തെ മുറിച്ച്‌ കടക്കുന്ന ബിന്ദുവിനെ നമ്മുടെ പൂര്‍വ്വികര്‍ കേതു(Descending Node) എന്ന്‌ വിളിച്ചു.
സൂര്യനും ഭൂമിയും ചന്ദ്രനുമേലെ ചെലുത്തുന്ന ആകര്‍ഷണം മൂലം ചന്ദ്രന്റെ പഥം ഒരു പ്രത്യേക തരത്തില്‍ കറങ്ങി കൊണ്ടിരിക്കുന്നു. ഈ കറക്കത്തിന് Regression of Moon's Orbit എന്ന്‌ പറയുന്നു. ഇത്തരം ഒരു കറക്കം പൂര്‍ത്തിയാകാന്‍ ചന്ദ്രന്റെ പഥം 18.6 വര്‍ഷം എടുക്കും. അതായത്‌ ഒരു വര്‍ഷം ഏതാണ്ട്‌ 19 ഡിഗ്രി കറങ്ങും. ഈ ഒരു കാരണം കൊണ്ട്‌ ആയിരിക്കാം നമ്മുടെ പൂര്‍വ്വികര്‍ ഈ ബിന്ദുക്കളെ ഗ്രഹങ്ങളായി കരുതിയത്‌. ഭാരതീയജ്യോതിഷത്തില്‍ രാഹുവിനേയും കേതുവിനേയും ഇപ്പോഴും ഗ്രഹങ്ങളായിത്തന്നെയാണ് കണക്കാക്കുന്നത്.
 |
ജ്യോതിശാസ്ത്രവുമായി ബന്ധപ്പെട്ട ഈ ലേഖനം അപൂര്‍ണ്ണമാണ്‌. ഇതു പൂര്‍ത്തിയാക്കാന്‍ സഹായിക്കുക. |
