Nuklid
From Wikipedia
As een Atomkarn oder ok Nuklid warrt in de Karn- un Atomphysik de innere Deel von een Atom betekend. De Elektronenhüll spelt dorbi also keen Rull.
Een Atomkarn sett sik ut de Nukleonen tohopen, dat sünd de Protonen un de Neutronen. Een Nuklid hett jümmers een bestimmte Tall von de beiden, dorüm snackt man ok von een Karnsorte. Opschreven warrt de Nukleonen links mang dat Symbol von dat chemisch Element: Ünnen kummt de Ordnungstall, welke de Protonen angift, un boben de Massentall, de Protonen und Neutronen tosam angift. De Ordnungstall warrt meist gor nich hinschreven, as se dör dat Elementensymbol sowie al faststeiht.
Eenige Nuklide warrt in besünnere Begreppen tohopenfaat. Atomkarns, de sik bi de Neutronen ünnerscheed, ober de glieke Ordnungstall hebbt, warrt ok Isotope nöömt. De höört al to een un dat sülbe Element. Wenn annersrüm Nuklide ünnerscheedlich veel Protonen hebbt, ober de Neutronentall gliek is, denn snakt man von Isotonen. Un denn gift dat noch Nuklide, de ünnerscheedlich veel von beide Nukleonen hebben künnt, ober al de glieke Massentall hebbt. De warrt denn Isobare nöömt, wat soveel as gliek swar.
Eenige Nuklide sünd öber längere Tiet nich stabil un fallt denn uteenanner. Disse unstabilen Nuklide sünd radioaktiv un warrt dorüm ok as Radionuklide betekend. In de Natur kommt ungefiehr 270 stabile un noch mol 70 radioaktive Nuklide vör. Ober meer as dat veerfache dorvon kummt noch as künstlich herstelte Elemente dorto, de denn meist ok nich stabil sünd. Een Öbersicht von al de Nuklide, de dat gift, warrt as Nuklidkort betekend. De sütt meist ut wie dat Periodensystem in de Chemie man is noch veel gröter.
