Buffy the Vampire Slayer
Frå Wikipedia – det frie oppslagsverket
Buffy the Vampire Slayer, kalla Buffy, vampyrenes skrekk på norsk, er ein amerikansk TV-serie som gjekk frå 1996 til 2003. Serien blanda tradisjonelle skrekkfilmelement med typiske amerikanske ungdomsseriar. Serien var laga av Joss Whedon og produsert av 20th Century Fox. Han er lauseleg knytt til filmen med same namn frå 1980-talet med Christy Swanson i hovudrolla.
[endre] Emne
Serien tek for seg livet til ei ung jente, Buffy Summers (Sarah Michelle Gellar), som er peikt ut til å vera vampyrjegaren for sin generasjon. Ho kjem til ein ny skole i den vesle byen Sunnydale, der ho straks vert teken vare på av ein vaktar, Rupert Giles (Anthony Stewart Head). Plikta hennar er å «stå einsam mot mørkekreftene» og om naudsynt ofre livet for å redde verda. Samstundes ønskjer Buffy å vera ei vanleg tenåringsjente med vanlege interessar.
På skolen vert ho vener med den intellektuelle og noko blyge Willow Rosenberg (Allyson Hannigan) og taparen Xander Harris (Nicholas Brendon), som med tida hjelper Buffy utor ei rekkje kniper og stundom berger livet hennar. Med tida utvikler Willow trolldomskrefter og vert ei dugande heks.
Hovudfienden til Buffy er vampyrane som det kryr av i den vesle byen. Byen er tilfeldigvis lagt over ei opning til Helvete, og sydar av merkelege hendingar. Ein vampyr, Angel (David Boreanaz), kjem inn som rådgjevar og ven for Buffy, og med tida vert han kjærasten hennar. Skilnaden på han og dei andre er at han har sjel. Elles kjempar Buffy mot alle slag vette, demonar og ulike formar for utyske frå underverda.
Lagnaden til Angel vert fortald i avleggarserien med same namn, som ofte kryssar med handlinga i serien om Buffy.
[endre] Mytologi
Verda Buffy bur i er kalla buffyverset. Mytologien er tufta mykje på gamalt folkeminne og sagn, men óg på verka til mellom andre H. P. Lovecraft. Som hjå Lovecraft har buffyverset ei opphavssegn om «dei gamle», The old ones, som trødde jorda før menneska vart skapte. Desse var «reine demonar», og dei fleste av dei fór av eller vart drepne før menneska kom. Ein av desse blanda blod med eit menneske, og slik vart den første vampyren til. Vampyrane er rekna som lengt nede på rangstigen for demonane, ureine skapnader som lever av menneskeblod og som skapar nye vampyrar ved å byte blod med dei menneska dei drikk av. Tidleg i menneskesoga vart det sett opp ei ordning: Kvar ættled skal ha ein vampyrjegar, alltid ei ung jente, som vert utvald til å slost mot dei. Når ein jegar døyr, vert ein ny kalla. «Vaktarrådet» vart sett opp for å finne dei potensielle jegarane, som får ein vaktar til hjelp for seg. Buffy er den første som bryt reglane i dette spelet, av di ho har vener som stør ho, og difor kjem det brått inn meir enn ein jegar (Først Kendra Young i andre sesongen, og sidan Faith Lehane frå tredje sesong og ut), og ved hjelp av Willow sørgjer Buffy for å endre spelet heilt på slutten av serien.
I buffyverset er det og plass til trollkyndige og heksekunstar. Vaktarene er som regel trollkyndige.
