Marcellin Albèrt
Un article de Wikipèdia, l'enciclopèdia liura.
Marcellin Albèrt (en francés Marcelin Albert) (nascut lo 29 de març de 1851 a Argelièrs, Aude, mòrt en 1921) foguèt un dels personatges occitans mai importants de la debuta del sègle XX perque foguèt lo menaire de la revòlta de 1907. Escaissat dins son vilatge, Lo Cigal e l'Apòstol per los vinhairons. Batejat per Mistral Lo grand bolegaire dòu brave pòble de la tèrra.
Somari |
[Modificar] Biografia
[Modificar] Enfància e joventut
Marcellin Albèrt nasquèt en 1851 dins una familha fòrça modèsta plan enrasigada dins la viticultura a Argelièrs (Aude). Son paire moriguèt quand teniá pas que 5 ans e foguèt doncas abalit per sa maire e son grand. Se n'anèt de l'escòla (l'institucion religiosa Montès a Carcassona) tre que faguèt sos 16 ans per ajudar e trabalhar las vinhas de la familha. Prenguèt de sos estudis l'amor de la retorica e tanben del teatre. En 1870, quand esclatèt la guèrre entre França e Alemanha, mentre qu'èra dispensat de conscripcion per sa situacion familhala d'orfanèl, Marcellin amb pas que 19 ans s'engatgèt. L'envièron dins lo regiment dels 2ème Tirailleur a Mostaganem, en Cabilia.
Aprèp que tornèt a son terrador, se maridèt en 1873. Faguèt de cafetièr al vilatge e participava a de representacions localas de teatre (se ditz que montèt a París per ensajar de far flòri dins las arts) abans de venir qualques annadas mai tard lo simbòl, la persona mai emblematica de la granda revòlta lengadociana del sègle XX.
[Modificar] La revòlta dels vinhairons
Marcellin Albèrt entamenèt sa tièra d'amassadas politicas, que lo menariá dins maites endreches de Lengadòc (e tanben a Perpinhan), a Ovelhan ont se reuniguèron, aquel 18 de març de 1907 aperaquí 2.000 personas. Aquela chifra d'assistents anèt en créisser long de las reunions per arribar enfin, a la desena amassada, lo 9 de junh a Montpelhièr, a gaireben 800.000 personas.
En seguida de la revòlta e dels incidents que dins tot Lengadòc èran a créisser, Marcellin Albèrt partiguèt per París lo 21 de junh. Dos jorns mai tard, lo 23 de junh èra recebut per Clémenceau e parlèron amassa tres quarts d'ora. Aprèp èsser tornat en cò sieu lo jorn seguent, se constituiguèt presonièr lo 26 de junh. Aquela entrevista amb lo president francés marquèt la fin del ròtle politic e una pèrdia de carisme e de poder irremediabla pel menaire occitan vist que ne sortiguèt discreditat essent acusat de s'èsser vendut per 100 francs.
[Modificar] La casuda
Aprèp la tornada de París, aquel personatge, qu'abans èra estat aclamat per totes e percebut coma una mena d'eròi, foguèt vilipendiat e venguèt una mena de leprós dins tot lo país. Aital manquèt d'èsser penjat dins son quite terrador rebutat per totes. Partiguèt alara en Algeria ont foguèt aculhit per de vinhairons. Subrevisquèt gràcias a l'ajuda d'aquelas gents que lo sauvèron de la misèria. Se moriguèt en 1921 a l'edat de 70 ans.
