Antrea Finucchiaru Aprili
Di Wikipedia, l'enciclopedìa lìbbira.
Antrea Finucchiaru Aprili (Lercara, 26 di giugnu 1878 - Palermu, 15 di jinnaru 1964) hà statu nu pulìticu sicilianu, membru di primu òrdini dû Muvimentu pâ Nnipinnenza dâ Sicilia.
Ìndici |
[cancia] Biografìa
Fu figghiu di Camiddu Finucchiaru Aprili, pulìticu libbirali e ministru di Grazzia e Justizzia dû cuvernu talianu di Alessandro Fortis.
[cancia] Primi travagghi pulìtici
Accuminciau la sò attività pulìtica vinennu eliggiutu a diputatu ntô 1913 comu libbirali. Ntô 1920 vinni numinatu suttasiggritariu â Guerra e macari ê Finanzi ntô cuvernu talianu di Francesco Saverio Nitti quinni, doppu lu primu cuvernu di Mussulini, participau â fasi di nurmalizzazzioni dû cunzenzu pupulari ô nascenti riggimi fascista.
La sò fiùra nti stu primu pirìudu cumpari cuntruversa, prima libbirali e appoi fascista. Secunnu certiduni jìu contru ô statu fascista mentri, secunnu àutri, circau macari di pigghiari nu rolu pulìticu di primu òrdini, jennu a parrari cû stissu Mussulini pi avìri na pultrona di sinaturi. Si dici macari ca iddu na vota, nti l'anni 1930ini, avisso dinunziatu lu capu diriggenti dû Bancu di Sicilia, Giuseppe Dell'Oro, picchì era abbreu, pi circari di pigghiari lu sò postu. Ma chisti, comu assai sustèninu, sunnu prubbabbirmenti sulu vuci jittati dâ prupaganna talianista pi nfancari lu megghiu nnipinnintista di Sicilia.
[cancia] La trasuta nti lu nnipinnintismu sicilianu
Turnau ntâ pulìtica doppu lu svarcu di l'alliati ntô 1943 funnannu lu Muvimentu Nnipinnintista Sicilianu e ajutannu lu Esèrcitu Vuluntariu pâ Nnipinnenza dâ Sicilia. Mantinni macari stritti cuntatti chê sirvizzi siggreti miricani e nglisi pi circari l'appoju di sti nazzioni ntô prucessu di Nnipinnenza. Ntô 1944 scampau a n'agguatu a bbêri Recalbutu ma, ntô stissu annu, vinni ncarziratu pi òrdini dû cuvernu di Ferruccio Parri. Turnau lìbbiru ntô 1945 ma, nti l'uttùviru dû stissu annu, vinni dû novu ncarziratu nzemi ô sò cumpari Ninu Varvaru e mannatu ô cunfinu pulìticu a Ponza unni arristau nzinu ô aprili dû 1946.
Ntô 1946 vinni eliggiutu diputatu pi l'Assimbrea Custituenti ntê listi dû Muvimentu Nnipinnintista Sicilianu. Ntô 1948 rifiuta la càrrica di Sinaturi di drittu, sfidau dû novu l'urni pi èssiri ntô primu Parlamentu Ripubblicanu, ma nun vinni eliggiutu, e lu Muvimentu Nnipinnintista Sicilianu pirdìu accussì ogni rapprisintanza parlamintari. Succissivamenti, addiveni membru di drittu dâ Àuta Corti pâ Riggiuni Sicilia vutànnusi a bbêri ê cumunisti.
[cancia] Doppu l'èbbica dû Siparatismu
Sfasciànnusi lu Muvimentu Nnipinnintista Sicilianu, si luvau dâ pulìtica attiva. Pruvau a turnari ntô 1953, quannu accittau, senza vèniri eliggiutu, di èssiri capulista di l'Allianza Dimucràtica Nazziunali, na lista fatta di espunenti libbirali e cintristi ajutata dû Partitu Cumunista Talianu, svurgìu nu rolu di "cura" contru la "liggi-truffa" elitturali.
