Linguaggiu dî signa nicaraguenzi
Di Wikipedia, l'enciclopedìa lìbbira.
Lu linguaggiu dî signa nicaraguensi (o ISN, Idioma de Señas de Nicaragua o Idioma de Signos Nicaraguense) è un linguaggiu dî signa sviluppatu spuntaniamenti di picciriddi surdi nta certi scoli dû Nicaragua uccidintali nnî 1970ini e 1980ini. È di particulari ntiressi pî linguisti picchì cci offri n'oppurtunità ùnica di studiari la nàscita d'un novu linguaggiu.
[cancia] Storia
Prima di l'anni sittanta, nun c'èranu cumunità di surdi ntô Nicaragua. Li surdi èranu largamenti isulati, unu cu l'àutru, e usàvanu sìmprici sistemi di signa e gesti casulianti pi cumunicari chî soi famigghî e chî soi amici. Li cundizzioni nicissarî finu a quannu si sviluppassi un linguaggiu si chiumperu ntô 1977, doppu un centru pi l'aducazzioni dî diversi àbbili criau un prugramma d'aducazzioni pi giùvani surdi chi fu siquitu, nizzialmenti di 50 picciriddi. Lu nùmmuru di studenti dâ scola (a Managua, abbicinu a San Judas) criscìu finu a 100 ntô 1979, annu dâ rivuluzzioni Sandinista.
Ntô 1980, un'àutra scola grapìu a Managua, sta vota si trattava di na scola pi picciuteddi chi fu chiamata Villa Libertad. Ntô 1983 c'èranu 400 studenti surdi nnî du' scoli. Nizzialmenti, lu prugramma di canuscenza dû linguaggiu suttalinniava lu spagnolu parratu e la littura dû mussu, addimentri l'usu dî signi dâ parti dî nzignanti era limitatu a l'usu di sìmprici signa p'indicari li littri di l'alfabbetu. Lu prugramma appi picca successu, e tanti studenti nun rinisceru a capiri lu significatu dî palori. Tuttavia, li mumenti 'n cui li picciriddi arristaru linguisticamenti sparti dî soi nzignanti: nnû parcu, nnî curridoi e ntô autubus di scola, criaru l'occasioni di cumunicari tra iddi stissi. Sta cumunicazzioni vinni fatta cu na cumminazzioni di gesti e elimenti dû sistema dî signi casulianti. Sta cumminazzioni criau di prima un sistema di cumunicazzioni sìmili a chiddu di du' furasteri ca cèrcanu di capìrisi, ma poi un linguaggio abbastanti chiaru accuminzau a ciuriri araciu araciu. Li picciriddi stàvanu criannu lu sò linguaggiu. Stu primu traguardu veni difinutu Lenguaje de Signos Nicaragüense (LSN), e è ancura usatu d'arcuni d'iddi chi èranu già picciuteddi quannu accuminzaru a jiri a sta scola.
