Cyriel Van Hauwaert
From Wikipedia
- Dit artikel es geschreevn in 't Môoslees, en da zoe best ozô bluuvn.
Cyriel Van Hauwaert (officieel "Cyrille van Hauwaert"), geboren te Môoslee de 16de december 1883, gestorv'n te Zellyk de 15 februoari 1974.
Cyriel Van Hauwaert wos als joenk vintje stook're in d'alkoholfabrieke van Camiel Lammertyn. Je moste van zinnen boas wok d' andelsbriev'n oltemets me zien velo roenddroag'n, ofdat da nu in Môoslee wos of in Ostende. Camiel Lammertyn zoag rap dat Cyriel koersebêen ad en kochte ne koersevelo vor em. Vanof zien 14 moest ie no Vrankryk in de stêenovens goan werk'n. Da wos zwoar labeur vo winnig geld ... Doarom wilde hie in Vrankryk goan koers'n, omdat ie wiste da ze doa toamlyk veel geld kostn verdien. De grôte velofabriek'n add'n ol eigen ploeg'n en ne coereur krêeg materioal en elpers van under.
In 1907 trok Van Hauwaert noa Paries vo te proberen te startn in Paries - Roebei (Nederlands: Parijs-Roubaix). Moa van de direksje kreegt'en gêen gangmoakers. Ze wilden zien kostn vo de terugreize betoaln, moa da wos nie nôdig: je wos me zien velo noa Paries gekom! Je startte toch, volgenst de legende "me twêe reservetuben, twêe eiers en n floske limenoade". An den arrivee in Roebei wos tie twidde, achter n volpartie kort voa 't binn'ryn van de velodrom! Twêe moand'n loatre woen tie Bordeaux - Paries (Bordeaux-Parijs ). Doardeure wierd ie in Belgje lyk nen nationoalen eld oentvang'n.
De velosport wierd wok van langsom poppulairdre. Vele joenge gasten begosten wok te koers'n, omda ze zoag'n dat er mêer mee te verdien viel dan me te goan werk'n. Van Hauwaert krêeg noamelyk zêre n contract van ne Franske ploeg en je verdiende 3000 fr in e moand!
Je wos dus eigentlyk den êesten Flandrien en je krêeg de bynoame "De Leeuw van Vloander'n".
In Môoslee es 't er n stroate genoemd noar em.
[bewerk'n] Vôornamste uutsloagen
- 1907: 2e in Paries - Roebei
- 1907: 1e in Bordeaux - Paries
- 1908: 1e in Miloan - San Remo
- 1908: 2e in Belgisch kampioenskap
- 1908: 1e in Paries - Roebei
- 1908: 2e in Paries - Brussel
- 1908: 2e in Bordeaux - Paries
- 1909: 1e in Belgisch kampioenskap
- 1909: 1e in 2e rit Roende van België, Iper
- 1909: 1e in 4e rit Roende van België, Noamen
- 1909: 3e in klassement Ronde van België
- 1909: 1e in 1e rit Tour de France, Roubei
- 1909: 1e in Bordeaux - Paries
- 1910: 1e in Paries - Mêende (Nederlands: Menen)
- 1910: 2e in Paries - Roubei
- 1910: 4e in klassement Tour de France
- 1910: 3e in Paries - Brussel
- 1911: 3e in Belgisch kampioenskap
- 1911: 3e in Paries - Roubei
- 1911: 2e in Paries - Tours
- 1911: 2e in Zottegem
- 1911: 3e in Roende van Lombardije
- 1912: 2e in Zesdoagse van Brussel
- 1913: 2e in Bordeaux - Paries
- 1913: 2e in Paries - Brussel
- 1914: 1e in Zesdoagse van Brussel
- 1914: 3e in Bordeaux - Paries
- 1915: 1e in Zesdoagse van Brussel
Achter zien lôopboane als coureur èt ie de bloei'nde zoake 'Cycles Van Hauwaert' in Ronse upgericht.
