Picanol
From Wikipedia
- Dit artikel es geschreevn in 't Ypers, en da zoe best ozô bluuvn.
Picanol Group is en internaschonoaln Belgischn groep die especialiseerd is in de fabricoasje e verkoop va weefgetouwn. 'n Oofdzetel is in Yper.
Inoud |
[bewerk'n] De geschiedenisse in 't kort
De geschiedenisse van Picanol es straf nouwe verweevn met d'istorie van de Familie Steverlynck die ol in Vichte en Argentinië stief actief wa in den textiel.
De vôorloper van Picanol ontstond in 1928 bie de firma "Vansteenkiste" in Yper die maschienn voe de vlasverwerkienge makte. Der zat wel vele geld in van de Steverlyncks.
Z'an oek goeie contactn met e poar Spoansche weefspecialisten die wegelôpen an voe 'n Spoansch'n burgerôorloge.
[bewerk'n] 't Begun
- In 1936 richt Charles Steverlynck e bedryf up: Weefautomaten Picanol nv. Jaimé Picañol, ne Spoanschn enzjienieur, ad êen van d'êeste weefgetouwn emakt me 'n otomoatischn schietspoele, 'n Omnium die rap vele succes adde. Vier joarn loater kunn'n ze êén Omnium doags moak'n.
- In 1951 verovert Picanol 'n textielweireld mèd e machine woavan dazze d'r 160.000 kunn'n verkoop'n.
[bewerk'n] Professionaliserieng
- In 1966 goa 't bedrif no de Beurze. In 1970 volgn Bernard Steverlynck (vôorzitter van de Raad van Bestuur) e ze broere Emmanuel (CEO) nunder voader Charles up.
- Nu en toen zorgt Picanol voen e weireldprimeur: in 1975 bevôorbeeld moak'n ze d'êeste weefmachiene zoender schietspoele: 't goarn is en bitje natemakt en met e luchtstroom wegeschootn.
- In 1987 komt Patrick Steverlynck (zeune van Emmanuel) CEO en Vôorzitter.
- 't Ende joarn '80, begun joarn '90 komt Picanol grodder en grodder: deur fabriek'n te begunn'n in aar land'n (lyk in China) of deur aar bedryvn over te neemn.
- In 2002 veruust Picanol na nieuwe gebouwn da ze 'Ypres Textile Center' noemn.
[bewerk'n] Miender goe joarn
't Is overol crisis, en Picanol voel et oek. Nunder cyfers zyn nog goed, moa dat is voen e grôot stik deur 't succes in China. Nu en toene moetn z'ier te lande menschen ofdank'n.
Ondertusschn zyn z'oek an de derde generoasche van de famille, de generoasche in familiebedryven woa dat dikkers omploft. De familieconflictn tusschn de mêer actieve andêeloeders en de passievre die ollêne moa kykn oe da nunder kluutn upbryngn vergrôotn moa en 't zyn van langstom mêer "professionele" besteurders van buutn de famille ineschoakeld.
Setoe in 2004 kwaamn ze negatief in 't nieuws. Juuste achter dan der 21 menschen nunder werk kwyt woar'n, kwaam et uut da Jan Coene, gedelegeerd besteurder, up drie joar tyd 22 meljoen euro in ze beuz'n estook'n at, up e maniere die ni ol te zuver e wos. Z'en nem toene zêre buutn ewupt, mor ondertusschn a Patrick Steverlynck, die ter wel mêer van wiste, oek nie vele goe punten mir over.
[bewerk'n] Multinational
Picanol is e Vlamsch'n groep, moa z'en oek belangn in Olland, Duutsland, Vrankryk, Italie, Turkije, Roemeenje, Brazilje, China, Indoneesje, Mexico, en Amerika.
