Linet
Èn årtike di Wikipedia.
On linet (on dit eto on linroû, on friyon, on gris), c' est on nozé moxhon tchanteu, del famile des tcheutches (frindjilidîs), ki dmeure el Walonreye, dins les bwès di l' esté, mins ki rvént dins les håyes e l' ivier. I magne des grinnes di såvadjès plantes, dins les crombires. Il est gris; li måle est rodje sol gavêye, et a ene rodje calote. Onk des prumîs a s' acopler å bontins. Cwand on l' mete dins ene gayole, i dvént rade tot mannet. Si no e walon provént do lén, pask' i magne voltî les grinnes di lén.
Si no e sincieus latén, c' est Carduelis cannabina (davance Acanthis cannabina) pask' i magne voltî les grinnes di tchene.
Li linet est eto lomé rodje linet (li måle), gris linet (li frumele), blanc linet (sôre avou dipus d' blanc so les penas), franc linet (moxhons såvadjes, eneviè les cis ki djonnlèt dins des gayoles.
Li linet n' est nén l' minme oujhea kel djaene linet u vete linete
[candjî] Tos les nos do linet e walon
- linet (Disfondowe: lënet).
- linete (Disfondowes: lignète).
- linot
- linote ([Disfondowe: lënote).
- linea (Disfondowes: linê, ligna, lëgna, lègn'ré, lèn'rya, lergna).
- linroû (prononcî lin'rou; Disfondowes: lignroû, lignrou, linrou, lén'rou, lènroû).
- friyon (Disfondowes: fiyon, fouyon, fion')
- gris, pitit gris.
Sourdant: Notûle A.L.W. 8.63. et mape 8.38.
