Aérotrain
vanuit Wikipedia, die vrye ensiklopedie.
Die Aérotrain was 'n Franse sweeftrein, wat in die tydperk tussen 1965 en 1977 deur die ingenieur Jean Bertin ontwerp is.
Die konsep van die Aérotrain het baie ooreenkomste met dié van die magneetsweeftrein getoon; albei is ontwerp om bo-oor hulle spoor te sweef, sodat die enigste weerstand, wat hulle moet oorkom, die lugweerstand sou wees. Sodoende was die Aérotrain in staat om baie hoë reissnelhede te bereik, terwyl sy energieverbruik en geraas matig gebly het. Bowendien was sy tegnologie - in vergelyking met magneetsweeftreine - minder ingewikkeld, en sy spoor kon teen laer koste gebou word.
Daar is altesame vyf prototipes ontwikkel en gebou: Die 01, 02 (wat ook op die beeld vertoon word), S44, I-80 en I-80 HV. Die I-80 was 'n passasierswa, wat op sy toetslyn 80 passasiers kon vervoer. Met 'n gemiddelde snelheid van 417,6 en 'n maksimale snelheid van 430 kilometer per uur het dit op 5 Maart 1974 'n nuwe wêreldrekord vir landgebonde lugkussingvoertuie opgestel.
Die Aérotrain-projek is in 1977 - weens 'n gebrek aan fondse, die afsterwe van die ontwikkelaar Jean Bertin en die goedkeuring van die TGV-konsep deur die Franse regering as die oplossing vir die vraagstuk van landgebonde hoësnelheidsvervoer - gestaak.
[wysig] Eksterne skakels
- Die Aérotrain
- Bertin Technologies: Aérotrain-video
- 'n Promosionele video van Windrider Train Company, wat die Aérotraintegnologie verder wil ontwikkel, uit die jaar 2005
 |
Hoësnelheidstreine |
|---|---|
| Acela Express | Aérotrain | AVE | Eurostar | Eurostar Italia | InterCityExpress | JR-Maglev MLX01 | Magneetsweeftreine | Pendolino | Shinkansen | TGV | Thalys | Treno Alta Velocità | Transrapid |
