Eidgenössisches Departement für Verteidigung, Bevölkerungsschutz und Sport

Us der alemannische Wikipedia, der freie Dialäkt-Enzyklopedy

Technische Yschränkung:
Dr koräkt Titel wär: »Eidgenössischs Departement für Verteidigung, Bevölkerigsschutz und Schport«

Dialäkt: Züridütsch (See)

S Eidgenössische Departement für Verteidigung, Bevölkerigsschutz und Schport (VBS) isch eis vo de sibe Departement (Minischterie) i dr Schwiizer Regierig. Jewiils eine vo de Bundesrät schtaht em Departement vor.

S zentrale Aaliege vom VBS isch es, "Sicherheit und Bewegig" für d Schwiiz und ihri Bevölkerig z schaffe. Armee, Bevölkerigsschutz und zivili Inschtitutione schaffed nach em Grundsatz "Sicherheit dur Kooperation" eng zäme. Sie schützed und helfed im In- und Ussland. D Friedensförderig isch en wichtige Biitrag zur internationale Sicherheit und demit au zur Sicherheit vo dr Schwiiz. Mit em Bundesamt für Schport förderet s Departement Schport und Bewegig uf nationaler Ebeni und treit so zur Gsundheit vo dr Bevölkerig bii.

S VBS gliederet sich i di vier Bereich:

Verteidigung
Bevölkerigsschutz
Schport
Armasuisse (Rüschtigsbeschaffigsaaschtalt)

Am Aafang vom Bundesschtaat höt das Departement schlicht "Militärdepartement" gheisse. 1979 isch es umbenännt worde in "Eidgenössischs Militärdepartement" (EMD). Mit dr Integration vom Zivilschutz und dr Schportförderig i das Departement treits siit 1998 de Name "Eidgenössischs Departement für Verteidigung, Bevölkerigsschutz und Schport".

Dr Usslandsnachrichtedienscht vo dr Schwiiz - Schtrategische Nachrichtedienscht (SND) - isch direkt em Chef vom VBS underschtellt. Ebefalls zum Bereich vom VBS ghöred d Nachrichtedienscht Militärische Nachrichtedienscht (MND) und Luftwaffenachrichtedienscht (LWND). Lueg dezue: Schwiizer Nachrichtedienscht.