Sternbild
Us der alemannische Wikipedia, der freie Dialäkt-Enzyklopedy
Es Sternbild isch e Gruppe vo Sterne, wo e Figur darstellt, maistens e Person oder e Tier usde griechische Mythologie. I de moderne Astronomie sind 88 Sternbilder definiert, wobi jedes en latinische Name trait. Die maiste Sternbilder stammet us de Antiki, aber anderi sind jünger. So natüürli au die, wo die alte Grieche und Römer no nöd hend chöne kene, well si zwiit im Süde liget.
Inhaltsverzeichnis |
[ändere] Mesopotamie und Ägypte
Die ältischte Zügnis vo Sternbilder stammet us Mesopotamie. Scho früe, um 1000 v.Chr., isch e Liste - bekannt unterem Name MUL.APIN - mit de Sternbilder gschribe worde. Die Tafle schribt die Sterne drei verschidnige Götter zue: 33 ghöret zum Luftgott Enlil, 23 zum Himmelgott Anu und 15 zum Wassergott Ea. Öberhopt sind in Mesopotamie vill astronomischi und astrologischi Text verfasst worde, so as mer hüt recht guet Bschaid drüber waiss. I dere Lischte erschiinet bereits die maiste Bilder vom Tierchrais: Himmelsstier, Grossi und Chliini Zwilling, Chreps, Loi, Ähre (=Spica / Jungfrau), Schkorpioo und Gaissefisch (=Staibogg). Dagege: Lohnarbaiter (=Widder), Barke (=Schütz) und Schwalbe (=Fisch).
Schlechter gsiets us, wemer üse Blick ufs alti Ägypte vode Faraone wörfet. Zwor sind e paar Text und au Bilder bekannt. Aber bis hüt isch mer no nöd i de Laag, da Wüsse au sicher zentschlüssle. Identifizierbar sind nume grad Mesechtiu (msḫtjw "Ochsebai" =Gross Bär), Sah (s3ḥ =Orion), Sothis (spd.t =Sirius). D Ägüpter hend d Ekliptik nöd i zwölf Tierchraiszaiche uufteilt, sondern i 36 Dekan. D Näme vo dene sind zwor bekannt, aber was si bidütet und weli Sterne si genau bezaichnet, wüssemer nöd. Es schint, as da Wüsse ghaim gsii isch und für magisch-astrologischi Zweck brucht worden isch.
[ändere] Grieche und Römer
D Sternbilder sind imene längere histoorische Zitruum gwachse. De Homer und de Hesiodos nenet so nume folgendi Sterne: Bäärin oder Wage (=Groos Bäär), Plaijaade, Hyaade, Orion, Hund oder Sirius, Bootes (=Bärehüeter) und Arktur. Spöter hend d Grieche de Himmel uusbaut noch verschidene Heldesaage, die wichtigste sind de Perseus und der Herakles. De Filosoof Eudoxos vo Knidos, wo im 4. Johrhundert vor Christus glebt het, kennt 43 Sternbilder und bis zum Ptolemäus (2.Jh.n.Chr.) sind no sechs witeri dezue cho, so ases am End 48 Sternbilder gsii sind, wo d Grieche und d Römer benennt hend. 48 (statt 49) sinds drum, well s Sternbild Hoor vode Berenike ide Almagest vom Ptolemäus nöd als aigeständigs Bild ufgfüert isch.
D Herkunft vode Sternbilder sind verschidnigi. De Name vom Groos Bäär het bi de Grieche Arktos (Bäärin) ghaisse, bi de alte Inder aber Rkshas (ŕkṣāḥ Bääre, d.i. Bärin mit drüü Junge), de Name dörft also uralt sii. Au für de Name vode Plaijaade vermuetet mer indogermanischs Eerb. De Chlii Bäär het de Thales vo Milet vode Fönizier übernoo, wäret anderi Sternbilder zum Tail scho früener in Mesopotamie und Ägypte bekannt gsii sind.
[ändere] Araber
D Araber hend sich starch für d Astronomii interessiert und hend d Almagest vom Ptolemäus is Arabischi übersetzt. Die Text sind sinersits wider is Spanische oder s Latinische übersetzt, wobii mer die arabische Bezaichnige für d Sterne tailwiis bibhalte het. So isches cho, as vili Sternenäme usem Arabische chömet.
De weniger glehrte Araber, d Beduine und d Buure hend aber en aigni Tradition ghaa. Sie hend mehriri Sterne oder chlineri Gruppe benennt, um sich i de Wüesti zrechtfinde oder z bestime, wenns cho regne chunt, demits rechtzitig s Getraide ussaie chönet. Obwohl d Araber au die zwölf Tierchraiszaiche vode Grieche überno hend, so hends danebe vo de Inder System vode Mondhüser überno und d Ekliptik i 28 Sternguppe uftailt. Da System werd hüt no vo Bure in Saudi Arabie und im Jeme brucht. I de Zit vode Plaijaade tönds vorpflüege, im Aldebaran tönds egge, im Orion tönds saie und so witer.
[ändere] Germane
Nöd vill bikannt isch über die alte germanische Sternbilder. Am beste wüüset mer Bschaid über Island: Im 12. Joorhundert het en Alfraedhi íslenzk en astronomisches Traktätli gschribe, und zude latinische Näme zum Tail au alti iihaimische Näme agee, wo recht oobetürli tönet: ásar bardagi (Kampffeld vode Ase =Fuermaa), dagstjarna (Tagstern =Arktur), fiskikarlar (Fischer =Orion), leidharstjarna (Laitstern =Polarstern)), sjaustirni (Sibegstirn =Plaijaade), suthrstiarna (Südstern =Wega), úlfskjöptr (Wolfsrache =Andromeda) und vlfs keptr (Wolfsrache =Hyade), vagn (Wage =Gross Bäär) und kvenna vagn (Frauewage =Chlii Bäär). Anderi latinische Näme hetter aber aifach nume is Altisländische übersetzt.
I althochdütsche Glosse findet me dagege nume gad: leitesterne (Laitstern =Polarstern), segansa (Sägis =Orion), sibunstirni (Sibegschtirn =Plaijaade), stuffala (=Bäärehüeter) und wagan in himile (Wage im Himel =Groos Bäär).
[ändere] Volksmund
Zürcher Bible vom Ludwig Lavater (1527-1586) nennt im Buech Amos: "Der Herr machet den heerwagen, die sägeisen und die gluckerin mit iren jungen", da sind also der Groos Bäär, de Orion und d Plaijaade. De apizeller Arzt Titus Tobler schribt über de Hérrawaga (Groos Bäär): "wenn er nider stod, so geds wolfel brod, stot er höch, so geds thürsch" [264] und witers: "Die drei einen Dreiangel bildenden Sterne des Siebengestirns heissen Ròss. Man sagt, dass bei ihnen der Fuhrmann (ein kleines Sternchen) stehe." [370], gmaint isch s chlini Sternli Alkor (im Groose Bäär), wo hüt no Ritterli heisst. D Plaijade haisset au Bruthüenli oder Gluckhenn. Im Kanton Glarus isch de alti Name vom Polarstern uf s ganzi Sternbild vom Chlii Wage übertrait worde: d Leitstërne.
[ändere] Moderne Standarthimmel
1922 het de Henry Norris Russell mitere Liste vo 89 Sternbilder ufgwartet, wobi er alne e drübuechstabigi Abchürzig gee het. Er het sini Liste a de erste Generalversammlig vode Internationale Astronomische Union (IAU) z Rom im Joor 1922 vorgschtellt und die isch mit Begaisterig ufgnoo worde. A dere Versammlig isch au d Aazaal vode Sternbilder uf 88 festgsetzt worde (s Sternbild Argo isch nöd als aigeständigs Sternbild anerchennt wore). Und demit jo au kain Stern über de Haag frisst, het 1925 de belgischi Astronom Eugène Delporte de Uftrag übercho, de Sternbilder exakti Grenze z gee. Die sind denn 1928 a de dritte Versammlig vode IAU gnemigt und als verbindlich bestimmt worde.
[ändere] Liste vode 88 Sternbilder
| Dütsch Name | Latinisch Name | Abchürzig | Wichtigi Sterne | Ältist Beleg oder Erfinder |
| Andromeda | Andromeda | And | Alpheratz/Sirrah | Eudoxos, 4.Jh.v.Chr. |
| Luftpumpi | Antlia (Pneumatica) | Ant | Lacaille, 1752 | |
| Paradiisvogel | Apus | Aps | Plancius, 16.Jh. | |
| Wassermaa | Aquarius | Aqr | Sadalmelik | Aratos, 275 v.Chr. |
| Adler | Aquila | Aql | Atair | Euktemon, 430 v.Chr. |
| Altaar | Ara | Ara | Choo | Eudoxos, 4.Jh.v.Chr. |
| Widder | Aries | Ari | Hamal/Elnath | Kleostratos, 520 v.Chr. |
| Fuermaa | Auriga | Aur | Capella | Eudoxos, 4.Jh.v.Chr. |
| Bärehüeter | Bootes | Boo | Arktur | Homer, 8.Jh.v.Chr. |
| Graabstichl | Caelum (Caela Sculptori) | Cae | Lacaille, 1752 | |
| Giraff | Camelopardalis | Cam | Plancius, 16.Jh. | |
| Chreps | Cancer | Cnc | Acubens & Praesepe (Nebel) | Euktemon, 430 v.Chr. |
| Jagdhünd | Canes Venatici | CVn | Cor Caroli | Hevelius, 17.Jh. |
| Grooss Hund | Canis Maior | CMa | Sirius | Homer, 8.Jh.v.Chr. |
| Chlii Hund | Canis Minor | CMi | Prokyon | Eudoxos, 4.Jh.v.Chr. |
| Staibogg | Capricornus | Cap | Algedi | Euktemon, 430 v.Chr. |
| Kiel (vom Schiff Argo) | Carina | Car | Canopus | Eudoxos, 4.Jh.v.Chr. Lacaille, 1752 |
| Kassiopeia | Cassiopeia | Cas | Schedir | Eudoxos, 4.Jh.v.Chr. |
| Zentaur | Centaurus | Cen | Rigil Kentaurus/Toliman | Eudoxos, 4.Jh.v.Chr. |
| Keffois | Cepheus | Cep | Alderamin | Eudoxos, 4.Jh.v.Chr. |
| Waalfisch | Cetus | Cet | Deneb Kaitos & Mira | Eudoxos, 4.Jh.v.Chr. |
| Chamäleon | Chamaeleon | Cha | Plancius, 16.Jh. | |
| Zirkel | Circinus | Cir | Lacaille, 1752 | |
| Tuube | Columba | Col | Phakt | Plancius, 16.Jh. |
| Hoor vode Berenike | Coma Berenices | Com | Diadem | Konon vo Samos, 247 v.Chr. |
| Südlichi Chroone | Corona Australis | CrA | Alfecca Meridiana | Germanicus, 1.Jh.n.Chr. |
| Nördlichi Chroone | Corona Borealis | CrB | Gemma/Alphekka | Demokritos, 5.Jh.v.Chr. |
| Raab | Corvus | Crv | Alchiba | Eudoxos, 4.Jh.v.Chr. |
| Becher | Crater | Crt | Alkes | Eudoxos, 4.Jh.v.Chr. |
| Chrüz vom Süüde | Crux (Australis) | Cru | Acrux | Plancius, 16.Jh. |
| Schwaan | Cygnus | Cyg | Deneb | Eudoxos, 4.Jh.v.Chr. |
| Delfiin | Delphinus | Del | Sualocin | Euktemon, 430 v.Chr. |
| Schwertfisch | Dorado | Dor | Gross Magellansche Wulche | Plancius, 16.Jh. |
| Traach | Draco | Dra | Thuban | Eudoxos, 4.Jh.v.Chr. |
| Fülli | Equuleus | Equ | Kitalpha | Asklepiades, 1.Jh.v.Chr. |
| Eridanus | Eridanus | Eri | Achernar | Eudoxos, 4.Jh.v.Chr. |
| Chemische Ofe | Fornax (Chemica) | For | Lacaille, 1752 | |
| Zwilling | Gemini | Gem | Kastor & Pollux | Eudoxos, 4.Jh.v.Chr. |
| Chraanich | Grus | Gru | Alnair | Plancius, 16.Jh. |
| Herkules | Hercules | Her | Ras Algethi | Eratosthenes, 3.Jh.v.Chr. |
| Pendeluhr | Horologium | Hor | Lacaille, 1752 | |
| Wasserschlange | Hydra | Hya | Alphard | Eudoxos, 4.Jh.v.Chr. |
| Chliini Wasserschlange | Hydrus | Hyi | Plancius, 16.Jh. | |
| Inder | Indus | Ind | Plancius, 16.Jh. | |
| Aidechsli | Lacerta | Lac | Hevelius, 17.Jh. | |
| Loi | Leo | Leo | Regulus & Denebola | Euktemon, 430 v.Chr. |
| Chlii Loi | Leo Minor | LMi | Praecipua | Hevelius, 17.Jh. |
| Haas | Lepus | Lep | Arneb | Eudoxos, 4.Jh.v.Chr. |
| Woog | Libra | Lib | Zuben Elgenubi | (--) 237 v.Chr. |
| Wolf | Lupus | Lup | Eudoxos, 4.Jh.v.Chr. | |
| Luchs | Lynx | Lyn | Hevelius, 17.Jh. | |
| Laiere | Lyra | Lyr | Wega | Euktemon, 430 v.Chr. |
| Tafelberg | Mensa | Men | Lacaille, 1752 | |
| Mikroskoop | Microscopium | Mic | Lacaille, 1752 | |
| Aihorn | Moncerus | Mon | Plancius, 16.Jh. | |
| Flüüge | Musca | Mus | Plancius, 16.Jh. | |
| Winkelmääss | Norma | Nor | Lacaille, 1752 | |
| Oktant | Octans | Oct | Polaris Australis | Lacaille, 1752 |
| Schlangenträäger | Ophiuchus | Oph | Ras Alhague | Eudoxos, 4.Jh.v.Chr. |
| Orion | Orion | Ori | Beteigeuze & Rigel | Homer, 8.Jh.v.Chr. |
| Pfau | Pavo | Pav | Joo Tseo (Peacock) | Plancius, 16.Jh. |
| Pegasus | Pegasus | Peg | Markab | Euktemon, 432 v.Chr. |
| Persois | Perseus | Per | Mirfak/Algenib & Algol | Eudoxos, 4.Jh.v.Chr. |
| Föönix | Phoenix | Phe | Ankaa | Plancius, 16.Jh. |
| Mooler (Moolerschtaffelai) | Pictor (Equuleus Pictoris) | Pic | Lacaille, 1752 | |
| Südlich Fisch | Piscis Austrinus | PsA | Fomalhaut | Eudoxos, 4.Jh.v.Chr. |
| Fisch | Pisces | Psc | Alrescha | Demokritos, 5.Jh.v.Chr. |
| Hinterdegg (vom Schiff Argo) | Puppis | Pup | Naos | Eudoxos, 4.Jh.v.Chr. Lacaille, 1752 |
| Kompass (vom Schiff Argo) | Pyxis (Nautica) | Pyx | Lacaille, 1752 | |
| Netz | Reticulum | Ret | Lacaille, 1752 | |
| Pfiil | Sagitta | Sge | Sahm | Eudoxos, 4.Jh.v.Chr. |
| Schütz | Sagittarius | Sgr | Rukbat | Kleostratos, 520 v.Chr. |
| Schkorpioo / Schtarpioo | Scorpius | Sco | Antares | Kleostratos, 520 v.Chr. |
| Bildhauer (Bildhaueratelier) | Sculptor (Apparatus Sculptoris) | Scl | Lacaille, 1752 | |
| Schild | Scutum | Sct | Hevelius, 17.Jh. | |
| Schlange | Serpens | Ser | Unukalhai | Eudoxos, 4.Jh.v.Chr. |
| Sextant | Sextans | Sex | Hevelius, 17.Jh. | |
| Stier | Taurus | Tau | Aldebaran & Plaijaade | Pherekydes, 6.Jh.v.Chr. |
| Teleskoop | Telescopium | Tel | Lacaille, 1752 | |
| Südlichi Drüüegg | Triangulum Australe | TrA | Atria | Plancius, 16.Jh. |
| Drüüegg | Triangulum | Tri | Mothallah | Eudoxos, 4.Jh.v.Chr. |
| Tukaan | Tucana | Tuc | Plancius, 16.Jh. | |
| Grooss Bäär / Gross Wage | Ursa Major | UMa | Alioth & Mizar (mitem Alkor) | Homer, 8.Jh.v.Chr. |
| Chlii Bäär / Chlii Wage | Ursa Minor | UMi | Polarstern/Nordstern | Thales vo Milet, 6.Jh.v.Chr. |
| Segel (vom Schiff Argo) | Vela | Vel | Regor/Suhail al Muhlif | Eudoxos, 4.Jh.v.Chr. Lacaille, 1752 |
| Jungfrau / Jumpfere | Virgo | Vir | Spica & Vindemiatrix | Eudoxos, 4.Jh.v.Chr. |
| Flüügidi Fisch | Volans (Piscis Volans) | Vol | Plancius, 16.Jh. | |
| Füchsli | Vulpecula | Vul | Lucida Anseris | Hevelius, 17.Jh. |
Bimerkige:
- Die drüü Sternbilder Carina, Puppis und Vela sind usem antike Sternbild Schiff Argo entstande.
- De Homer nennt de Stern "Sirius" au "Hund", also aigetli no nöd s Sternbild als Ganzes
- Nöd berücksichtigt sind älteri Nennige vomene Sternbild in Mesopotamie.
[ändere] Lueg no
[ändere] Literatur
- Eckhard Slawik, Uwe Reichert: Atlas der Sternbilder. Spektrum Akademischer Verlag, Heidelberg 2004, ISBN 3-8274-0268-9
- Ian Ridpath: Die großen Sternbilder. Patmos, Düsseldorf 2004, ISBN 3-491-69112-5 (Die englische Ausgabe "Star Tales" online)
- Joachim Herrmann: dtv-Atlas Astronomie. DTV, München 2005, ISBN 3-423-03267-7
- Richard Hinckley Allen: Star Names – Their Lore and Meaning. Dover Publications Inc., New York 1963, ISBN 0486210790.
- Eugène Delporte: Délimitation scientifique des constellation, tables et cartes. IAU, Ath the University Press, Cambridge 1930.
