Tanga (ropa)
De Biquipedia
Una tanga ye una pieza de ropa interior de dimensions raditas que tapa minimamén a parti debantera d'o pubis e que dixa descubiertos os glutios.
Consiste en un trianglo, feito de tela u cuer, que s'alarga con una beta per cadagún d'os tres bertizes, dica enzertar-se en un punto que, en posar-se-la, se sitúa á la rematanza d'o esquinaz. A tanga propiamén dita adibe un altro trianglo chiquet que queda en a parti d'adezaga, chusto en o rancadero d'os glutios. Ta diferenziar-las, á la que no leba o trianglet posterior li'n dizen tanguita (tangueta). Á bezes ye clamata, coloquialmén, "fil dental". Tampoco no s'ha de trafucar con a tanga brasilense, que consiste en dos trianglos simetricos, un per a parti frontera e l'altro per a zaguera.
Contenius |
[Editar] Etimolochía
O més probable ye que a parola tanga, que se fa serbir en totas as luengas d'a peninsula Iberica, i plegase per meyo d'o portugués prozedén de bela luenga africana como la suajili.
[Editar] Oríchens
Piezas de ropa parixitas á las que güei se conoxen como tanga s'han emplegato dende fa sieglos, e continan emplegando-sen, per diferens pueblos d'Africa, America d'o Sur, o sureste asiatico i o Pazifico, con a fin de tapar e protexer os organos secsuals d'os dos secsos, en o que se conox con a parola castellana taparrabos ("tapacodas").
Encara que os danzaires d'estriptís l'eban portata con anterioridá, l'uso d'a tanga ganó popularidá en Ozidén en as plachas brasilenses en a decada de 1970. Con os abanzes en l'aliberazión d'os costumbres en o respeutibe á la libertá secsual, a pieza ha ito introduzindo-se en tot lo mundo ozidental.
[Editar] Popularidá
En a decada de 2000, a proliferazión d'a tanga como pieza intima de consumo ye estata meteorica, e se ye tornata un elemento destacato como pieza erotica e de fetichismo secsual. O feito que no se marque per debaxo d'os pantalons ha contrebuyito á un uso més regular de ropa zeñita en a muller. Encara que o suyo uso ye mayoritariamén femenino, tamién se ye encorporata á la bestimenta intima masculina.
As zagueras tendenzias d'a moda chobenil han dato encara més protagonismo á la tanga, á o estremo de dixar-la beyible per a parti posterior d'o cuerpo aprobeitando l'aparizión d'os pantalons de zintura baxa.
Tota ista popularidá no ye desenta de polemicas e descusions ocasionals en a soziedá en o tocán á l'uso d'a prenda en bels puestos publicos u per parti de misachas cada bez més chóbens.
[Editar] Se beiga tamién
- Biquini
- Tanga brasilense
