Bernaldo de Quirós
De Uiquipedia
Bernaldo (o Bernardo) de Quirós (1675 - 1710) ye'l nome pol que lliterariamente se conoz a Francisco Bernardo de Quirós y Benavides, l'únicu escritor n'asturianu del sieglu XVII, con Antón de Marirreguera, de los que se conserva dalguna obra.
Ye perimportante nun tracamundialu col autor de teatru, en castellán, Francisco Bernardo de Quirós (1580 - 1668), nin col militar del mesmu nome (1650 - 1708).
La vida de Bernaldo de Quirós ye escura abondo, anque pertenecía a una de les families de mayor nombradía de l'Asturies del sieglu XVII. Ye probable qu'el nuestru autor seya'l Bernaldo de Quirós que nació en L.lena hacia 1675, participó na guerra de sucesión con Felipe V y morrió inda mozu na batalla de Zaragoza.
Paez que fou poeta nomáu na so dómina y que compunxo un númberu importante d'obres. Asina, Gónzález de Posada cuenta que siendo estudiante llegó a copiar un volume enteru coles obres suyes, "toes elles romances". Sícasí solo llegó hasta nós el poema "El caballu."
"El caballu" ye un romance de 330 versos qu'adopta la forma epistolar. L'autor empondera les cualidaes d'un caballu que'l narrador quier vende-y al alférez mayor d'Uviéu pa que lu monte nes funciones reales y lleve'l pendón de la ciudá. Nel poema destaca'l tonu paródicu y la ironía que, con otros recursos como les hipérboles o les imáxenes forzaes, conviértenlu nun exemplu típicu de la estética barroca, a dicir del profesor Ramos Corrada.
[editar] Xuicios sobre l'autor
La obra de Bernaldo de Quirós recibió emponderances de varios autores, ente elles les del Padre Feijóo y, más cerca de nós, les de Xuan Xosé Sánchez Vicente:
"Era sujeto de exquisita vivacidad y penetración, de portentosa facilidad y elegancia en explicarse, de admirable facultad memorativa, insigne Poeta, Historiador, Humanista, Matemático, Filósofo. Sobre todo, la valentía de su numen poético, y la gracia y agudeza de su conversación, tanto en lo festivo como en lo serio, excedían a cuanto yo puedo explicar. Certifico, que las pocas veces que logré oírle, me tenía absorto y sin aliento para hablar una palabra, tanto por no interrumpir la corriente de las preciosidades que derramaba, cuanto por conocer que todo lo que yo podría decir parecía cosa vil a vista de la variedad y hermosura de sus noticias, juntas con la facilidad, energía, y delicadeza de sus expresiones" (Benito Jerónimo Feijóo: Teatro crítico universal, tomu 4, discursu 14, seición XXIII).
"Esti ye'l meyor poema, quiciabis, de la lliteratura asturiana. Ye dende llueu el más llibre d'influencies castellanes, non polos aspectos esternos, sinón fondamentalmente por razones de mena interna; porque'l mundu referencial y conceptual de la llingua ye talamente bable, anque'l tema seya netamente ciudadanu" (Xuan Xosé Sánchez Vicente, prólogu a la Esvilla de poesíes en llingua asturiana, 1979).
