Billy Wilder

De Uiquipedia

Samuel Wilder, más conocíu como Billy Wilder (Sucha, Austria, 22 de xunu de 1906 - Hollywood, Estaos Xuníos, 27 de marzu de 2002) foi un direutor de cine estaunidense d'orixe austríacu. Ñació en Sucha, nel entoncenes Imperiu Austruhúngaru.

Wilder pasó la so infancia y la so xuventú n'Austria. El so primer trabayu foi como cronista nel periódicu austriacu Juranek. Continuó trabayando como cronista en Berlín, teniendo qu'alternar esta ocupación con otres pa sobrevivir. Ellí aficionóse al cine, tres ver delles películes que lu impresionaron fonderamente. Una d'elles foi L'acorazáu Potemkin, de Sergei Eisenstein. Entró a trabayar pa la UFA onde conoció a los grandes direutores del momentu.

Tres l'ascensu al poder de Hitler, Wilder viose obligáu a abandonar Berlín, debíu a la so ascendencia xudía. La so ma morrería nos campos de concentración d'Auschwitz. Tuvo en París y, dende ellí, en 1934 treslladóse a Estaos Xuníos, xuntu al actor Peter Lorre. Wilder y Lorre compartieron apartamentu, fame y momentos perabegosos demientres una temporada. Ellí entamó a trabayar como guionista pa la Paramount, y tuvo la ocasión de collaborar con Ernst Lubitsch, el so gran mayestru. El día del so entierru dixo: "Quedamonos ensin Lubitsch. Pior entá, quedamonos ensin les películes de Lubitsch".

Como guionista, Wilder escribió 60 películes. Como direutor, realizó 26 películes. Foi galardonáu con siete Oscar tres ser nomináu en 21 ocasiones.

En 1981 dirixó la so cabera película, Equí, un collaciu. A magar d' entós les compañíes aseguradores yá nun queríen asegurar películes suyes debíu a la so avanzada edá. Morrió 21 años más sero a la edá de 95 años na so residencia de Beverly Hills, por mor d'una neumonía.

Nuna entrevista espublizada en 1952 Wilder enumeró les sos diez películes favorites:

1. L´acorazáu Potemkin (Sergei Eisenstein) (1925)
2. Fuñeria (Erich von Stroheim) (1923)
3. Varieté (Charles Dupont) (1925)
4. La quimera l'oru (Charles Chaplin) (1924)
5. Y el mundiu marcha (King Vidor) (1928)
6. La gran ilusión (Jean Renoir) (1937)
7. El delator (John Ford) (1935)
8. Ninotchka (Ernst Lubitsch) (1939)
9. Los meyores años de la nuesa vida (William Wyler) (1946)
10. El lladrón de bicicletes (Vittorio de Sica) (1948)

[editar] Filmografía como direutor

• 1981 - Equí, un collaciu (Buddy, Buddy)
• 1978 - Fedora (Fedora)
• 1974 - Primera plana (The Front Page)
• 1972 - ¿Qué ocurrió ente´l mio pá y la to ma? (Avanti)
• 1970 - La vida privada de Sherlock Holmes (The Private Life of Sherlock Holmes)
• 1966 - En bandexa plata (The Fortune Cookie)
• 1964 - Bésame, babayu (Kiss Me, Stupid)
• 1963 - Irma la duce (Irma la Douce)
• 1961 - Ún, dos, trés (One, two, three)
• 1960 - L´apartamentu (The Apartament)
• 1959 - Con faldes y a lo llocu (Some Like it Hot)
• 1958 - Testigu de cargu (Witness for the Prosecution)
• 1957 - Ariane (Love in the Afternoon)
• 1957 - L´héroe solitariu (The Spirit of St. Louis)
• 1955 - La tentación vive arriba (The Seven Year Itch)
• 1954 - Sabrina (Sabrina)
• 1953 - Traidor nel infiernu (Stalag 17)
• 1951 - El gran carnaval (Ace in the Hole)
• 1950 - El crepúsculu de los dioses (Sunset Boulevard)
• 1948 - Berlín Occidente (A Foreign Affair)
• 1948 - El vals del Emperador (The Emperor Waltz)
• 1945 - Díes ensin güella (The Lost Weekend)
• 1944 - Perdición (Double Indemnity)
• 1943 - Cinco tumbes al Cairu (Five Graves to Cairo)
• 1942 - El mayor y la menor (The Major and the Minor)
• 1934 - Curvies peligroses (Mauvaise graine)