Druide
Aus Wikipedia
A Druide oda Druid woa a Priesta und Gsetzgeba vo de Köitn. Gem hods as in Frankreich, wos domois Gallien ghoaß´n hod, und in Englond drentn. Bei de Iren woans a. Sunst woaß mas ned so genau. Obs a Weibaleid ois Druidn gebm hod, woaß ma ned a. Oba Priesterinnen homs scho a ghobt.
Inhaltsverzeichnis |
[dro wärkln] Wos a so gmochd hom
Bledaweis homd de Köitn nix aufgschriebm, jetzt woaß ma ned recht vui drüba. A poa Griechn (zum Beispü da Poseidonis und da Strabon) homd wos drüba aufgschriebm. Do hoaßts, daß de Druidn recht vui Ohnung vo da Astrologie, vo da Medizin und vom Politisiern ghobt homd. Und de Philosophie soid eana a rechd taugt hom. Da Cäsa hod a a wengal wos dazua beitrogn, daß ma heid wos vo de Druidn woaß. Oba wei ea mit de Druidn ned so a Freid ghobt hod, muaß ma a wengal aufpaßn bei eam. Späda homd de Christn in Irlond und Schottland donn wos notiert. Ob a do muaß ma schaun, wos stimmt, wei de homd gern a bißl ebbs umgschriebn, damits eana einipaßt. De Wissnschoft moant, daß de Druidn a recht a hoche Stöllung ghobt homd a da köitischn Gsöschoft. Se homd fei voam Kini redn deafn und monchmoi homs as sogoa gschofft, daß an Kriag vohindan, obwoi de zowa vofeindtn Seitn scho aufmaschiad gwen han. Des is gonga, weis gmoant hom, daß des grod ned paßd. Und wos a ned schlecht woa: Ois Druide hod ma koane Steian ned zoid, und zum Heer homs a ned miaßn.
Oaganisiert woans recht guad, und zwoa londesweit noch ana Hierarchie. Oamoi im Joah hom sa se troffn. Des woa in am heilign Woid im Lond vo de Karnuten. Des woa a Stomm a da Mittn vom heidign Frankreich. Des woaß ma a vom Cäsa. Druide hod ned jeda wean derfn. Nua de Bessagstödn homs bei eana zualossn.
Weis nix aufgschriebn homd, miaßns a recht a guads Gedächtnis ghobt hom. Wei se homd se eanane Göttagschichtn und astrologischn Sochan nur gegnseitig vazöhd und a so meaka miaßn. Des homds woahscheinlich mit mehr oda weniga longe Gstanzl träniad, wei wonns a se reimt, merkt ma si des leichta. De Ausbüdung hod, laut am Cäsa, fost zwoanzg Joah dauad. Ka Wunda. Da Cäsa hod a gschriebn, daß de Druidn de Gestz gmocht und ausglegt homd. Nua weis nix aufgschriebn homd, hoaßt des oba ned, daß koa Kuidua ned ghobt händ. Zum Rechnen homs außadem auf Griechisch gschriebn, späda donn auf Ladein.
In Irlond woan de Röma nia, deszweng hom se duad drent de Druidn am längst hoidn kinna. Wia donn späda de Christn kema sand, sand de Druidn vaschwundn. Monche moanan, daß a poa vielleicht ins Klosta gonga hand. So is de irische Kirchn a wengal ondasd wuan ois wia de römisch-katholische. Vo Irlond und Schottlond aus is donn a de easchte Missionierungswöön üba Europa ausgonga. Aus dera Zeit gibts erstuanlichaweis koane Meatüra. Die iro-schottischn Mönche deafn do a recht a guads Gspia ghobt hom. Meglichaweis wei ebn a poa druidische Aunsichtn midgspuid homd. Die easchtn Klesta aufm Festlond sand vo iro-schottische Mönche gründt wuan. In Wean hoaßt da Schottnring noch eana, weis duatn gwohnt hom.
[dro wärkln] De Druidn und de Röma
Wia gsogt, da Cäsa hods ned rechd meng und hods vafoign lossn. Des woa ned unbedingt üblich bei de Röma, wei eigentlich homs de Religionen mid de datzuagherign Priesta vo de erobatn Lända imma in Ruah loßn. Oba de Druidn homd eftas an Aufstond auzeddld, weiß de Röma aus Gallien nausschmeißn woidn. Des homds ob nimma gschofft. Endgültig vabotn sands donn 54 n. Chr. wuan. Des woa da Kaisa Claudius.
[dro wärkln] Heitzdogs
In Englond, Schottlond und in Irlond homd se seit a poa duzad Joah wieda a poa Leid zomgfundn, de wos vasuachan, des Druidntum wieda auflem zloßn. Des hod mit der Originale oba woahscheinli ned vui zan toa. Im Fernsehn segt ma inzwischn a scho recht vui zu dem Thema. Und wei de Köitn so schene Musta mocha hom kina, loßn se neiadings a gaunza Haufa junga Leid soichane Musta auffitätowian. Ob de Druidn domis des a gmocht hom, ko ma ned sogn.
[dro wärkln] Persönlichkeitn
Da bekonntaste Druide is woahscheinli da Mirakulix aus de Asterixheftl. Duatn ponscht der a Zaubatrangl, damit de Gallier de Röma oane aufs Mei haun kinnan. Fia de Gallier is des wia fia de Baian as Bier. In des Saftl duad da Mirakulix untaondam oiwei recht vui Mistl eini.
